रवि लामिछानेलाई आज रुपन्देही लगिँदै, सुरक्षा व्यवस्था कडा

इच्छाकामना न्युज

२७, कार्तिक २०८१

रवि लामिछानेलाई आज रुपन्देही लगिँदै, सुरक्षा व्यवस्था कडा

पोखरा । राष्ट्रिय स्वतन्त्र पार्टीका सभापति रवि लामिछानेलाई आज बयानका लागि रुपन्देही लगिने भएको छ ।

उनलाई बिहान ५ः४० बजे नै प्रहरीको टोलीले त्रिभुवन अन्तर्राष्ट्रिय विमानस्थल पुर्‍याएको थियो। तर,हुस्सुका कारण उडान प्रभावित भएकोले लामिछाने केही समय एयरपोर्टमै रोकिएका थिए।

प्रहरीका अनुसार बयानको प्रक्रिया आजै सम्पन्न गरी उनलाई पुन: कास्की फर्काउने तयारी गरिएको छ। यसअघि, बुटवलस्थित सुप्रिम ऋण तथा बचत सहकारी संस्थाको १४ करोड २९ लाख रुपैयाँ गोर्खा मिडिया नेटवर्क प्रालिमा लगानी गरिएको भन्दै लामिछाने र जीवी राईसहित १२ जनालाई पक्राउ गर्न रुपन्देही जिल्ला अदालतले अनुमति दिएको थियो।

संसदीय छानबिन विशेष समिति र प्रहरीको प्रतिवेदनअनुसार, सुप्रिम सहकारीबाट करिब १ करोड ९६ लाख रुपैयाँ लामिछानेकै नाममा निकालिएको र थप १४ करोड २९ लाख रुपैयाँ विभिन्न व्यक्तिमार्फत गोर्खा मिडिया नेटवर्कमा लगानी गरिएको पाइएको छ। यसअघि सूर्यदर्शन सहकारीको रकम अपचलन प्रकरणमा कास्की प्रहरीको हिरासतमा रहेका लामिछानेलाई बुटवलस्थित सुप्रिम सहकारी ठगी प्रकरणमा थप अनुसन्धानका लागि रुपन्देही ल्याइएको हो।

प्रहरीले सुप्रिम सहकारीसँग सम्बन्धित बयान आजै सक्ने तयारी गरिरहेको छ।