१५ मंसिर, गोरखा । गोरखा नगरपालिका–५ को वडाध्यक्ष पदमा भोलि आइतबार हुने उपनिर्वाचनको सम्पूर्ण तयारी पूरा भएको छ । मतदान स्थल र केन्द्रहरु समेत तयार भइसकेका छन् ।

उपनिर्वाचनका लागि स्वाँराको गोरखकाली र अमराईको शिवशक्ति आधारभूत विद्यालयलाई मतदान स्थल तोकिएको मुख्य निर्वाचन अधिकृत शिवबहादुर रानाभाटले बताए । ‘दुई वटा मतदान स्थल हो । मतदान केन्द्र भने ३ वटा छन्’, उनले भने ।

शिवशक्ति आधारभूत बिद्यालय भएको मतदान स्थलमा क र ख गरी दुई वटा मतदान केन्द्र रहेको उनले जानकारी दिए । निर्वाचन आयोगले कात्तिक २७ गते प्रकाशत गरेको अन्तिम मतदाता नामावली अनुसार उक्त वडामा २ हजार २२५ मतदाता छन् ।

१ हजार ५०१ जना मतदातालाई शिवशक्ति आधारभूत विद्यालय र बाँकी ७ सय २४ मतदातालाई गोरखकाली आधार विद्यालयमा मतदान स्थल तोकिएको छ । उपनिर्वाचनको समय तालिका बिहान ७ बजेदेखि साँझ ५ बजेसम्म तोकिएको छ ।

वडा नाकामा कडाइ, उपनिर्वाचन क्षेत्रमा पास बिना सवारी चलाउन नपाइने

वडा प्रवेश गर्ने नाकाहरुमा चेकजाँच बढाइएको जिल्ला प्रहरी प्रमुख एसपी वासुदेव पाठकले बताए । अवाञ्छित गतिविधि हुन नदिन टोल टोलमा प्रहरी पनि परिचालन गरिएको उनले जानकारी दिए ।

दुवै मतदान स्थलहरुको शनिबार मुख्य निर्वाचन अधिकृत, प्रमुख जिल्ला अधिकारी, सुरक्षा निकायका प्रमुख लगायतका टोलीले अनुगमन तथा निरीक्षणसमेत गरेका छन् । भोलि सो वडा क्षेत्रभित्र बिना पासका सवारी सञ्चालन गर्न नपाइने बताइएको छ ।

यसअघिका वडाध्यक्ष खिलबहादुर रानाको २०७९ साल कात्तिक १० गते मृत्यु भए पश्चात रिक्त रहेको पदमा उपचुनाव हुन लागेको हो । चुनावमा ९ दलका उम्मेदवारबीच प्रतिस्पर्धा हुने भएको छ ।

चुनावलाई मध्यनजर गर्दै गोरखा नगरपालिकाले भोलि सार्वजनिक बिदा समेत दिएको छ । गण्डकी प्रदेशभर गोरखा ५ एक मात्र उपनिर्वाचन हुन लागेको क्षेत्र हो । वडाकै भएपनि यो चुनावलाई दलका मुख्य नेताहरुले आफ्नो राजनीतिक औचित्य र प्रतिष्ठासँग जोडेर हेरेका छन् ।