कमल रावल, अछाम, १३ पुस । सुदुरपश्चिमका जिल्लाहरुमा विद्यालय जाने उमेर समूहका किशोरीहरु निरन्तर सिकाईबाट वञ्चित हुने अवस्था छ । छोरालाई मात्रै पढाउनु पर्छ भन्ने अभिभावकको गलत मानसिकता र घरको कामले विद्यालय समय बाहेक पढ्न नपाउने अवस्थाका कारण किशोरीको शिक्षामा असर पुगेको छ । 
कामकै बोझले कतिपय किशोरी ढिलो विद्यालय पुग्ने र समयमै गृहकार्य गर्न नपाउने अवस्थामा छन् । मङ्गलसेन नगरपालिका वडा नम्बर १३ का देविका थापा, शिशु सुधार माध्यामिक विद्यालयको कक्षा १० मा पढ्नुहुन्छ । तर उहाँलाई समयमा विद्यालय पुग्न मुस्किल पर्छ । 
घरमा खाना पकाउने, पानी ल्याउने, घाँस दाउरा काट्ने कामले पढाई प्रभावित भएको उहाँ बताउनुहुन्छ । गङ्गा माध्यामिक विद्यालयमा कक्षा ८ मा अध्ययनरत धिर्जा भण्डारीको समस्यापनि उस्तै छ । घरधन्दाकै कामले विद्यालयको गृहकार्य गर्न नपाउने अवस्था छ भने, ढिलो पुग्दा पढाई नै प्रभावितहुने गरेको छ । अभिभावकको विभेदका कारण छोरालाई पढ्ने वातावरण मिले पनि छोरी काममा खटिनु पर्ने बाध्यता छ । समाजको यस्तो मानसिकता परिवर्तन गर्न आवश्यक रहेको एकजना अभिभावक मीन प्रसाद भण्डारी बताउनुहुन्छ । 
शिक्षाविकास तथा समन्वय ईकाईको तथ्याङ्क अनसार अछाममा आधारभुत र माध्यामिक गरि ५ सय २ वटा विद्यालय छन् र सबै विद्यालयमा छात्राको सङ्ख्या बढि छ । तर ठुलो कक्षामा पुगेपछि विद्यालय छोड्ने प्रवृतिमा पनि छात्राहरुमै बढि छ । छोरा र छोरीमा हुने विभेदका कारण निरन्तर सिकाई प्रभावित बनेकाले यस्तो समस्या आएको नन्दा माध्यामिक विद्यालयका कालिका प्रधानाध्यापक सुरत बहादुर रावलको भनाई छ । 
हरेक बालिका तथा किशोरिलाई गुणस्तरीय शिक्षा पाउने अधिकार छ, घरका अभिभावकले पारिवारिक, सामाजिक, तथा आर्थिक समस्या देखाउँदै छोरीको पढाईमा बाधा पु¥याउनु सामाजिक अपराध हो ।