आँबुखैरेनी गाउँपालिका १ नं. वडाकार्यालयको भवन उद्घाटन

इच्छाकामना न्युज

१४, माघ २०७७

आँबुखैरेनी गाउँपालिका १ नं. वडाकार्यालयको भवन उद्घाटन

आँबुखैरेनी, १४ माघ । तनहुँको आँबुखैरेनी गाउँपालिका वडा नं. १ को वडाकार्यालय भवन उद्घाटन भएको छ। नेपाली कांग्रेसका केन्द्रिय सदस्य एवं पूर्व वनमन्त्री शंकर भण्डारीले आज बुधबार एक कार्यक्रमका बिच वडा नं. १ को वडाकार्यालय उद्घाटन गरेका हुन्।
वडा नं. १ का वडाध्यक्ष किसान थापाको सभापतित्व तथा नेपाली कांग्रेसका केन्द्रिय सदस्य एवं पूर्व वनमन्त्री शंकर भण्डारीको प्रमुख आतिथ्यतामा वडाकार्यालयको नवनिर्मित भवनको उद्घाटन भएको हो।

भवन उद्घाटन कार्यक्रमलाई सम्बोन्धन गर्दै पूर्ववनमन्त्री भण्डारीले गण्डकी प्रदेशको प्रवेशद्वारको रुपमा रहेको आँबुखैरेनी गाउँपालिका नमुना बन्न सकोस् भनी शुभकामना व्यक्त गरेका थिए।
कार्यक्रमलाई सम्बोन्धन गर्दै गाउँपालिका अध्यक्ष गिर बहादुर थापाले आफुहरुले जनप्रतिनिधीको रुपमा कार्यभार सम्हालिरहदा हालसम्म ९० प्रतिशत कामहरु सफलतापूर्वक सम्पन्न गरेको बताए।

यस्तै गाउँपालिकाका प्रमुख प्रशासकिय अधिकृत विष्णुप्रसाद पोखरेलले पछिल्लो समय गाउँपालिकाले एक वर्ष भित्र गर्ने कामहरु योजनावद्ध रुपमा गर्ने गरि अगाडी बढिरहेको जानकारी दिए। कार्यक्रममा अधिकृत पोखरेलले ७४ लाख ५९ हजार ९ सय ८६ रुपैंया ७२ पैंसाको लागतमा वडा कार्यालय भवन निर्माण भएको बताए। उनले अन्य वडाका भवनहरु निर्माणको अवस्था बारे पनि जानकारी दिएका थिए।
कार्यक्रममा जिल्ला समन्वय समिति तनहुँका सभापति शान्तिरमण वाग्ले लगायत विभिन्न स्थानीय संघसंस्था तथा राजनैतिक दलका प्रतिनिधीहरुको समेत सहभागिता रहेको थियो।