चेरेश । गोरखाको मनकामनामा अवस्थित प्रसिद्ध धार्मिक स्थल मनाकामना माईको मन्दिर जाने दर्शनार्थीहरुलाई मध्यनजर गर्दै देशमै पहिलो पटक संचालनमा आएको मनकामना केवलकार २६ औँ बर्षमा प्रवेश गरेको छ । वि.सं. २०५५ साल मंसिर ८ गतेदेखि व्यावसायीक रुपमा संचालनमा आएको मनकामना केवलकारले आजबाट सेवा संचालनको २५ बर्ष सफलता पूर्वक पुरा गरि २६ औँ बर्षमा प्रवेश गरेको हो । 

प्रतिष्ठित व्यवसायी स्वर्गीय लक्ष्मणबाबु श्रेष्ठले वि.स. २०५३ सालमा  कम्पनी स्थापना गरि वि. सं. २०५४ साल माघको अन्तिम साताबाट केबलकार निर्माणको कार्य सुरु गर्नुभएको थियो । निर्माण थालिएको १० महिनापछि वि. स. २०५५ साल मंसिर ८ गतेदेखि व्यवसायिक रुपमा केवलकार सञ्चालनमा आएको थियो । 

सुरुवाती बर्षमा वार्षिक २/३ लाख यात्रुहरुलाई सेवा दिदैँ आएको केबलकारले हाल वार्षिक ११ लाख यात्रुलाई सेवा दिँदै आइरहेको छ भने हरेक वर्ष यो संख्यामा वृद्वि हुदै गएको छ । यस वर्ष पनि केवलकारका यात्रु संख्यामा वृद्वि हुने सञ्चालक राजेशबाबु श्रेष्ठले बताउनुभयो । २५ औं वार्षिकोत्सवको अवसरमा चितवनको इच्छाकामना गाउँपालिका ४ कुरिनटार (चेरेस) स्थित बटम स्टेशनमा आयोजित पत्रकार सम्मेलनमा पत्रकारहरुलाई जानकारी गराउदै यस वर्ष १२ लाख ५० हजार यात्रुलाई केवलकारले सेवा दिने लक्ष्य लिएको उहाँले बताउनुभयो । यस्तै कार्यक्रममा अहिलेसम्म २५ वर्षको अवधिमा १ करोड ८० लाख ९३ हजार यात्रुले केवलकारको सेवा लिएको उहाँले बताउनुभयो । 

केबलकार सञ्चालन पश्चात प्रसिद्ध धार्मिक स्थल मनकामनाका साथै आसपासका क्षेत्र एक प्रमुख पर्यटकीय गन्तव्य बनेको र यस क्षेत्र भारत लगायत विश्वरभरमा महत्वपूर्ण गन्तव्यको रुपमा स्थापित भएको सञ्चालक श्रेष्ठको भनाई छ । उहाँका अनुसार यहाँ आउने पर्यटक मध्ये २५ प्रतिशतको हाराहारीमा भारतीय पर्यटक रहने गरेका छन् ।

संचालक श्रेष्ठले  मनकामना  दर्शन प्रालिले मनकामना आसपासका क्षेत्रमा विकास, स्वास्थ्य, शिक्षा तथा विपन्न वर्गलाई सहयोग गर्दै आएको पनि बताउनुभयो । विनाशकारी गोरखा भूकम्पपछि पश्चिम गोरखाका ७–८ स्थानीय तहलाई कम्पनीले राहत उपलब्ध गराएको थियो ।

सामाजिक व्यवसायिक उत्तरदायित्व नीति अनुसार कम्पनीले केवलकार टिकट आम्दानीको कुल रकमको १÷१ प्रतिशतका दरले कुल २ प्रतिशत रकम गोरखाको  शहिद लखन गाउँपालिका र चितवनको  इच्छाकामना गाउँपालिकालाई  वर्षेनी सहयोग गर्दै आएको उहाँले बताउनुभयो । 

 सञ्चालक श्रेष्ठले एक वर्षमा २ करोड हाराहारीमा आयकर तिर्दै आएको बताउनुभयो  । केबलकारबाट गत आर्थिक वर्षसम्ममा कम्पनीले १ अर्ब ५० करोड रुपैयाँ राजस्वमा योगदान गरेको छ । पर्यटनतर्फ सबैभन्दा बढी कर तिरेवापत आन्तरिक राजस्व विभागले मनकामना केबलकारलाई बिहीबार सम्मानित समेत गरेको थियो।

यस्तै वार्षिकोत्सवको अवसरमा मनकामना केवलकारले आज बटम स्टेशनको प्राङ्गणमा रक्तदान कार्यक्रमको समेत आयोजना गरिएको थियो ।

पूर्ण डिजिटल प्रविधिमा स्तरोन्नती गरिने

यसैबिच मनकामना केबलकारलाई पूर्ण डिजिटल प्रविधिमा स्तरोन्नती गरिने भएको  छ । २५ बर्ष पुगिसकेको हालको  एनालग  प्रविधिको मर्मत सम्भार गर्नुका साथै स्प्रेयर पार्टस् समेत पाउन कठिनाई हुने स्थितिलाई मध्यनजर गर्दै यस प्रविधिलाई हालकै नविनतम डिजिटल प्रविधिमा  स्तारोन्नती गर्ने भएको हो ।  हाल पहिलो चरणको काम सन् २०२१ मा सम्पन्न भइसकेको र बाँकी काम  सन् २०२४ को भदौ÷असोज महिना सम्ममा सम्पन्न गरिने श्रेष्ठले बताउनुभयो । स्तरोन्न्ती गर्न रु. ४५ करोड लगानी हुने उहाँले बताउनुभयो । श्रेष्ठका अनुसार अबको चरणमा कन्ट्रोल सिस्टम, कम्यूनिकेशन केबलका साथै केबलकारको लठ्ठा फेरिने छ । 

यसैबिच  मनकामना केबलकारहाताभित्र  सुविधा सम्पन्न रिर्सोट सञ्चालन गर्ने भएको छ । हाल निर्माण कार्य भइरहेको ४० कोठाको रिर्सोटमा  स्वीमिङ पुल,हेल्थ क्बल, सभा सेमिनार हल, र रेष्टुरेन्ट सुविधा रहने श्रेष्ठले बताउनुभयो । मनकामना दर्शन प्रालिबाट सञ्चालन हुने यस रिर्सोटका लागि  ५५करोड रुपैयाँ लागने अनुमान रहेको  उहाँले बताउनुभयो । सन् २०२४ को अन्त्यमा वा २०२५ को सुरुमा रिसोर्ट सञ्चालनमा ल्याउने उहाँको भनाई छ ।