गोरखा । बिगत दुई बर्षदेखि बन्द रहेको मनकामना सुति कपडा उद्योग पुनः संचालनमा आउने भएको छ । गोरखा नगरपालिका–११ मा रहेको उक्त उद्योग नयाँ व्यवस्थापन सहित पुनः संचालन गर्न लागिएको संचालक तुलसी देवकोटाले बताए । ‘गोरखा नगरपालिकाले दुई लाख बराबरको भौतिक सामग्री उपलब्ध गराउने भएको छ,’ उनले भने, ‘बन्द भएको उद्योग चलाउन त्यसले ठुलै राहत मिल्छ ।’

२०३९ सालमा स्थापना भएर संचालनमा आएको उक्त उद्योग २०७८ सालबाट बन्द भएको हो । कोरोना महामारीका कारण उद्योग बन्द गर्नुपर्ने बाध्यता भएको देवकोटाले जानकारी दिए । ‘हाम्रो उत्पादन देशैभर प्रख्यात थियो । ७७ वटै जिल्लामा उत्पादन बिक्री वितरण हुन्थ्यो तर बिभिन्न कारणले बन्द गर्नुपर्ने अवस्था सृजना भयो,’ उनले भने । उनका अनुसार उद्योगबाट उत्पादित स्वदेशी कपडाको साडी, पछ्यौरी, झोला, टोपीको बिक्री वितरण बढी हुन्थ्यो । जनजाती समुदायले ओड्ने पछ्यौरी र कपडाहरु पनि उत्तिकै लोकप्रिय थियो ।

‘हामीहरुले गुरुङ र मगरहरुले लगाउने भाङग्रा, ढाकाको कपडा र पछ्यौरीहरु बढी उत्पादन गथ्र्याै । पोखरादेखीका उद्योगहरु हाम्रोमा कपडा प्रशोधन गर्ने आउथेँ,’ उनले भने । उक्त उद्योगले धेरै महिलाहरुलाई रोजगारको अवसर दिलाएको देवकोटा बताउँछन् । ताप्ले, मनकामना लगायतका क्षेत्रका महिलाहरुलाई घरमै तान उपलब्ध गराएर रोजगार समेत दिएको उनी सम्झन्छन् । उनका अनुसार उद्योग संचालनको समयमा करिव ८० जनाले रोजगार पाएका थिए ।

दुई बर्षको अन्तरालपछि पुनः उद्योग संचालन गर्न पाउँदा उनी खुशी र उत्साहित देखिन्छन् । नयाँ ढंगबाट उद्योग संचालन गर्ने उनले योजना छ । ‘हस्तनिर्मित सामाग्री नै हाम्रो पहिचान हो अब यसलाई थोरै आधुनिकिकरण गरेर लैजाने मेरो लक्ष्य छ’, उनले भने । पहिले भन्दा केही फरक र आधुनिक उपकरणको प्रयोग गरेर उद्योग संचालन गर्न लागिएको उनले जानकारी दिए । उद्योग संचालनमा आए स्वदेशी उत्पादनले बजार पाउने र रोजगारको अवसर समेत सृजना हुने अपेक्षा उनको छ ।