मुग्लिन, ४ फागुन । ट्राफिक प्रहरी कार्यालय मुग्लिनको पनि आफ्नै कार्यालय भवन बन्ने भएको छ। त्रिवेणि युवा क्लब मुग्लिनको पुलजिपमा निर्माणधिन रहेको भवन सँगै ट्राफिक प्रहरी कार्यालय मुग्लिनको पनि कार्यालय भवन बन्ने भएको हो। निर्माण सुरु गर्न लागिएको ट्राफिक प्रहरी कार्यालय मुग्लिनको कार्यालय भवनको आज बिहान इच्छाकामना गाउँपालिकाकी अध्यक्ष गीता गुरुङले शिलान्यास गर्नु भएको छ । भवन निर्माणका लागि गाउँपालिकाले पाँच लाख प्रदान गरिसकेको छ । केन्द्र, प्रदेश, स्थानीय सरकार तथा सहयोग संकलन गरी भवन निर्माण सम्पन्न गर्ने योजना रहेको सामाजिक अभियान्ता समेत रहेकी निर्माण समितिकी संयोजक सावित्री पुडासैनीले जानकारी दिइन । शिलान्यस कार्यक्रममा विभिन्न व्यक्तिहरुबाट भवन निर्माणका लागि करिब ८० हजार बराबरको नगर तथा जिन्सी सहयोग प्राप्त भएको छ । दुइ तले भवन निर्माण गर्ने योजना रहेको भन्दै संयोजक पुडासैनीले सरकार र दाताहरुबाट सहयोग संकलन गरी भवन निर्माण गरिने बताइन । कार्यक्रमकी प्रमुख अतिथि गाउँपालिका अध्यक्ष गुरुङले नागरिक सुरक्षाको लागि गाउँपालिका गम्भिर रहेको भन्दै सुरक्षाकर्मीको मनोबल बढाउने देखि पूर्वाधार निर्माणमा सहयोग गर्ने बताइन । निर्माण समितिकी संयोजक पुडासैनीको अध्यक्षतामा भएको कार्यक्रममा गाउँपालिकाको उपाध्यक्ष कृर्तिकुमार श्रेष्ठ, वागमती ट्राफिक प्रहरी कार्यालयका एसपी शान्तिराज कोइराला,वडा नं ५ का वडाध्यक्ष मोदराज सिलवाल,नेकपाका जुनाराज भण्डारी,नेपाली काँग्रेसकी सृजना देवकोटा, त्रिवेणी युवा क्लवका सचिव कुमार श्रेष्ठ लगायतले मन्तव्य राखेका थिए । निर्माण समितिका सचिव विष्णु कुँवरले सञ्चालन गरेको सो कार्यक्रममा सहसचिव राजेन्द्र त्रिपाठीले स्वागत मन्तव्य राखेका थिए ।