अमरराज नहर्की / तनहुँ, पुस १४ गते । तनहुँको आँबुखैरेनी गाउँपालिका र चितवनको भरतपुर महानगरपालिकालाई जोड्ने घुमाउनेघाटको पुल एक दशकदेखि बन्न सकेको छैन ।

आँबुखैरेनी–५ र भरतपुर–२९ घुमाउने जोड्ने त्रिशूली नदीमाथि बन्ने पक्की पुल निर्माणको काममा ढिलाइ भए पनि सम्बन्धित निकायले ध्यान दिन नसक्दा लामो समयदेखि अलपत्र परेको हो ।

पुल निर्माण पूरा नहुँदा गण्डकी प्रदेशको राजधानी पोखरालाई तराईसँग पृथ्वी राजमार्गको विकल्पका रूपमा जोड्ने छोटो दुरीको मार्ग सञ्चालनमा ल्याउन पाइएको छैन । २०७१ साल असारमा पुल निर्माणका लागि सम्झौता भएको थियो तर पुल अहिलेसम्म प्रारम्भिक चरणमा छ ।

अहिलेसम्म दुईतिरको भागमा पिल्लर मात्रै ठडिएको छ । सडक डिभिजन कार्यालयले सम्झौता अनुसार पनि काम नभए निर्माण कम्पनीलाई कालो सूचीमा राख्ने पटक पटक बताउँदै आएपछि खुरु खुरु म्याद थप गर्दै आएको छ ।

डिजाइन एन्ड विल्डका आधारमा ठेकेदार कम्पनीले नै तयार गरेको डिजाइन अनुसार पुल १०५ मिटर लम्बाइ र फुटपाथसहित ११ मिटर चौडाइ रहने छ । आधुनिक ‘आर्क’ डिजाइनमा बन्ने पुलको लागत आठ करोड २६ लाख रुपियाँ छ । दोहोरो लेनको पुलमा ७.५ मिटर गाडी हिँड्ने भाग रहने डिजाइनमा उल्लेख छ ।

हेडौँडास्थित मृत सञ्जीवनी निर्माण कम्पनीसँग भएको सम्झौता अनुसार हालसम्म ३० प्रतिशत मात्रै काम भएको सडक डिभिजन कार्यालयले जनाएको छ । सम्झौता भएको लामो समयसम्म पनि पुलले गति लिन नसक्दा यात्रुलाई सास्ती हुनुका साथै इन्धनमा हुने खर्च कटौती हुन सकेको छैन ।

सडक डिभिजन कार्यालय दमौलीकी प्रमुख सिनियर डिभिजन इन्जिनियर राजीव श्रेष्ठले पुलको डिजाइन परिवर्तन गर्न लागिएको पुल निर्माणको काम रोकिएको बताउनुभयो । श्रेष्ठले भन्नुभयो, “यस वर्षको वर्षायाममा नदीमा आएको बाढीले पिल्लर डुबाएकाले डिजाइन परिवर्तन गर्नुपर्ने देखिएकाले काम रोकिएको हो ।” पुल महाशाखालाई पत्राचार गरेर पुलको छिटो डिजाइन गरेर पठाउन भनिएको श्रेष्ठले बताउनुभयो ।

अहिलेको डिजाइनबाट बाढीले क्षति हुने देखिएको राज्यको लगानी खेर नजाओस् भनेर परिवर्तन गर्न लागेको श्रेष्ठ बताउनुहुन्छ । आँबुखैरेनी गाउँपालिका–५ का वडाध्यक्ष सन्तोष गुरुङले निर्माण कम्पनीको ढिलासुस्तीले गर्दा पुलको कामले गति लिन नसकेको सम्बन्धित निकायको पनि पटक पटक ध्यानाकर्षण गराइए पनि एक दशकसम्म पनि पुल अधुरो रहेको बताउनुभयो ।

गुरुङले भन्नुभयो, “अनेक बहाना बनाएर पुल निर्माणमा ढिलाइ गरिएको छ अति नै भएकाले दबाब दिन आन्दोलन गर्नुपर्ने देखिएको छ ।” उक्त पुलको निर्माणपछि चितवन आउन पोखरा, बागलुङ, पर्वत, बेनी, स्याङ्जा र दमौलीका बासिन्दाले डुम्रे, आबुँखैरेनी र मुग्लिङ सडक प्रयोग गर्नु पर्दैन । पुल ११ मिटर चौडाइको हुने छ ।

तनहुँको दमौलीबाट घुमाउनेघाटसम्म नियमित रूपमा साना बस चलेका छन् तर पुल नहुँदा ती सवारी नारायणगढ–मुग्लिङ सडकखण्डसम्म आइपुग्न सक्दैनन् ।

सेती नदीको किनारैकिनार घुमाउनेघाट, प्युघर, सराङघाट, मासीघाट, सुँढे, बेलबास हुँदै दमौली पुग्न सकिन्छ । घुमाउनेघाटमा भएको झोलुङ्गे पुलबाट मानिस मुग्लिङ–नारायणगढ सडकसम्म आउने जाने गर्छन् ।