आँबुखैरेनी, ८ फागुन । माई छिम्केश्वरी तमु सुधार समाज आँबुखैरेनी तनहुँले स्थापनको दुई वर्ष पुरा गरेको छ। २०७५ साल फागुन ८ गते अर्थात दुई वर्ष अघि आजकै दिन स्थापना भएको समाजले दुई वर्ष पुरा गरि आजदेखि तेस्रो वर्ष प्रवेश गरेको हो।

दुई वर्ष पुरा गरि तेस्रो वर्ष प्रवेश गरेको उपलक्ष्यमा समाजले आँबुखैरेनीमा आज एक कार्यक्रमको आयोजना गरि वार्षिकोत्सव मनाएको छ। वार्षिकोत्सवकै अवसरमा समाजले निर्माण गरेको नवनिर्मित समाज घरको समुद्घाटन समेत गरेको छ। समाजको नवनिर्मीत भवनको तमु ह्युल छोंज छोंज धीं गुरुङ राष्ट्रिय परिषद्का अध्यक्ष रेशम गुरुङ र आँबुखैरेनी गाउँपालिका अध्यक्ष गिर बहादुर थापाले संयुक्त रुपमा समुद्घाटन गरेको हो।

समाजले स्थापना भएको दुई वर्षमा नै २७ लाख रुपैंयाको लागतमा भव्य भवनको निर्माण गरेको हो। भवनसँगै सार्वजनिक शौचालयको पनि निर्माण कार्य सम्पन्न गरिएको छ। भवन उद्घाटन कार्यक्रममा भवन निर्माणमा नगद तथा जिन्सी सामान सहयोग गर्नुहुने महानुभावहरुलाई खादा, अबिर लगाएर सम्मान गरि प्रमाण पत्र बितरण गरिएको थियो। 

समितीका अध्यक्ष काजीकुमार गुुरुङको सभापतित्वमा भएको कार्यक्रममा प्रमुख अतिथि तमु ह्युल छोंज छोंज धीं गुरुङ राष्ट्रिय परिषद्का केन्द्रिय अध्यक्ष रेशम गुरुङ्ग, विशिष्ट अतिथिमा आँबखैरेनी गाउँपालिका अध्यक्ष गिर बहादुर थापा, तमु ह्युल छोंज छोंज धीं गुरुङ राष्ट्रिय परिषद् तनहुँका अध्यक्ष खेमराज गुरुङ्ग, तमु ह्युल छोंज छोंज धीं गुरुङ राष्ट्रिय परिषद् गोरखाका अध्यक्ष राम बहादुर गुरुङ्ग, अतिथिहरुमा आँबुखैरेनी गाउँपालिका वडा नं. ३ का वडाध्यक्ष पूर्ण बहादुर आले, वडा नं. ४ का वडाध्यक्ष नेत्र बहादुर गुरुङ्ग लगाएतको उपस्थिती रहेको थियो।

यस्तै कार्यक्रममा समाजका सचिव पृथ्वी बहादुर गुरुङले समाजको हालसम्मको प्रगति प्रतिवेदन प्रस्तुत गरेका थिए भने निर्माण समितिका संयोजक पृथ बहादुर गुरुङ भवन निर्माणको आयव्यय प्रस्तुत गरेका थिए। कार्यक्रमको बिच बिचमा समाजका युवा भाई बहिनीहरुले नृत्यहरु प्रस्तुत गर्नुका साथै लोकदोहोरी गायक पृथ्वी गुरुङ, चन्द्र परियार, सन्तोष थपलिया लगायतले सांगेतिक प्रस्तुती समेत राखेका थिए।