काठमाडौं । आज देशभर रामनवमी पर्व श्रद्धा, भक्तिभाव र हर्षोल्लासका साथ मनाइँदैछ । त्रेतायुगमा अयोध्याका राजा दशरथ र रानी कौसल्याका सुपुत्रका रूपमा जन्मिएका भगवान श्रीरामको जन्मोत्सवको रूपमा यो पर्व मनाइन्छ। चैत्र शुक्ल नवमीका दिन राम जन्मिएको विश्वासका साथ प्रत्येक वर्ष यो पर्व मनाउने गरिन्छ ।

रामनवमीको अवसरमा काठमाडौँ उपत्यकाका विभिन्न राम मन्दिरहरूमा बिहानैदेखि भक्तजनहरूको भीड लागेको छ । पशुपति क्षेत्रभित्र रहेको राम मन्दिर, बत्तिसपुतलीस्थित राम मन्दिर, सीतापाइला र चाबहिल क्षेत्रका मन्दिरहरूमा राम भक्तजन दर्शन पूजाका लागि जुटेका छन् । मन्दिर परिसरमा भजन–कीर्तन, पूजा–आरती र विशेष धार्मिक अनुष्ठानहरू सञ्चालन भइरहेको छ ।

विशेषगरी जनकपुरधाममा आज रामनवमी पर्व विशेष उत्साहसाथ मनाइएको छ। भगवान राम र माता सीताको विवाह जनकपुरमै भएको ऐतिहासिक मान्यताका कारण यहाँ यो पर्व विशेष महत्वका साथ मनाइन्छ ।

जनकपुरस्थित जानकी मन्दिरमा बिहानैदेखि विशेष पूजा, झाँकी प्रदर्शनी, राम–सीताको झुला यात्रा, भजन कीर्तनलगायत कार्यक्रमहरू आयोजना भएका छन्। देशभरबाट आएका श्रद्धालु तीर्थयात्रीहरूको उल्लेख्य उपस्थिति रहेको छ।

यस अवसरमा धार्मिक प्रवचन, रामायण पाठ, हवन, प्रसाद वितरणजस्ता गतिविधिहरूले मन्दिर क्षेत्रलाई भक्तिमय बनाएको छ । विभिन्न सामाजिक तथा धार्मिक संस्थाहरूले निःशुल्क पानी, प्रसाद तथा स्वास्थ्य शिविरको समेत व्यवस्था गरेका छन् ।

रामनवमीले धार्मिक तथा सांस्कृतिक चेतनासँगै समाजमा नैतिकता, सत्य र धर्मको मार्ग अनुसरण गर्न प्रेरणा दिने विश्वास गरिन्छ । यस पर्वले भगवान रामका आदर्श चरित्र, त्याग, सेवा र कर्तव्यबोधको स्मरण गराउँदै समाजमा सकारात्मक सन्देश फैलाउने काम गर्दछ।