काठमाडौं । युइएएफए च्याम्पियन्स लिग फुटबलको फाइनल खेल आज हुँदै छ । नेपाली समय अनुसार राति पौने १ बजे म्युनिखको अलियान्ज एरेनामा हुने फाइनलमा पेरिस सेन्ट(जर्मेन ९पीएसजी० र इन्टर मिलान आमने सामने हुने छन् ।

यो खेल युरोपेली क्लब फुटबल सिजनको समापनको रूपमा रहेको छ । जहाँ पीएसजीले आफ्नो पहिलो च्याम्पियन्स लिग उपाधि जित्ने सपना देखिरहेको छ भने इन्टरले आफ्नो चौथो उपाधि कब्जा गर्न चाहन्छ । पछिल्लो दशकमा पीएसजी च्याम्पियन्स लिगमा बारम्बार अन्तिम चरणसम्म पुगे पनि उपाधि जित्न असफल भएको छ ।

यस सिजनमा भने टोलीले लिग वान र कुप डे फ्रान्स जितिसकेको छ र अब च्याम्पियन्स लिग जितेर ट्रेबल पूरा गर्ने लक्ष्यमा छ । यो उपलब्धि फ्रान्सेली क्लबका लागि पहिलो हुनेछ । सन् १९९३ मा मार्सेले म्युनिखमा एसी मिलानलाई हराएर च्याम्पियन्स लिग जितेको इतिहासलाई दोहोर्‍याउने अवसर पीएसजीलाई छ । किनकि म्युनिखमा भएको चार फाइनलमा हरेक पटक नयाँ विजेता बनेको छ । इन्टरले पहिले नै तीन च्याम्पियन्स लिग उपाधि जितिसकेको छ र यो सिजनमा बायर्न म्युनिख र बार्सिलोनालाई हराउँदै फाइनलमा पुगेको छ ।

यद्यपि, सिरी ए र कोपा इटालियामा असफल भएपछि इन्टरले च्याम्पियन्स लिग जितेर सिजनलाई स्मरणीय बनाउन चाहन्छ । सन् २०२३ मा म्यानचेस्टर सिटीसँग फाइनलमा पराजित भएको इन्टरले त्यस हार विर्सियर नयाँ सुरआत गर्ने लक्ष्य पनि राखेको छ । पीएसजीले सेमिफाइनलमा इंग्लिस क्लब आर्सनललाई समग्रमा ३-१ ले पराजित गर्दै फाइनलमा स्थान बनाएको हो । पहिलो लेगमा १-० को जित हासिल गरेको पीएसजीले दोस्रो लेगमा घरेलु मैदानमा २-१ को रोमाञ्चक जित निकाल्यो ।

दोस्रो लेगमा फाबियान रुइज र अचरफ हाकिमीले गोल गरेका थिए । पीएसजी हाल सबै प्रतियोगितामा लगातार चार जितको लयमा छ । इन्टरले सेमिफाइनलमा स्पेनिस क्लब बार्सिलोनालाई समग्रमा ७-६ को रोमाञ्चक नतिजामा हरायो । पहिलो लेग ३-३ को बराबरीमा सकिएको थियो भने दोस्रो लेगमा घरेलु मैदानमा इन्टरले अतिरिक्त समयमा ४-३ को जित हासिल गर्‍यो । दोस्रो लेगमा चार खेलाडीले गोल गरेका थिए, जसमा अतिरिक्त समयमा एक गोल निर्णायक बन्यो । इन्टर हाल सबै प्रतियोगितामा पछिल्ला छ खेलमा अपराजित छ ।

सन् २०२३ को अगस्टमा भएको पछिल्लो भेटमा इन्टरले पीएसजीलाई २-१ ले हराएको थियो । यो नतिजाले इन्टरलाई मनोवैज्ञानिक लाभ प्रदान गर्न सक्छ, तर पीएसजी बलियो प्रदर्शनका कारण आत्मविश्वासमा हुनेछ । प्रमुख खेलाडी पीएसजीः उस्मान डेम्बेले पीएसजीका लागि च्याम्पियन्स लिगमा मुख्य हतियार बनेका छन् । उनले यस सिजनमा आठ गोल गरेका छन्, जसमध्ये दुई गोल खेलको पहिलो गोलको रूपमा आएका छन् । डेम्बेलेको गति र फिनिसिङले इन्टरको रक्षापंक्तिलाई चुनौती दिन सक्छ ।

इन्टर मिलानः लाउटारो मार्टिनेज इन्टरका प्रमुख खेलाडी हुन । उनले च्याम्पियन्स लिगको यो सिजनमा नौ गोल गरेका छन् । जसमध्ये चार गोल खेलको पहिलो गोलको रूपमा आएका छन् । सन् २०२४÷२०२५ सिजनमा गोल स्कोररको सूचीमा उनी पाँचौँ स्थानमा छन् । पीएसजीः च्याम्पियन्स लिगमा पछिल्ला आठ खेलमा लगातार गोल गर्दै आएको छ ।

घरेलु मैदानमा यो सिजनमा आठ खेलमा पाँच जित, एक बराबर र दुई हारको नतिजा निकालेको छ । हाल सबै प्रतियोगितामा तीन खेलको घरेलु जितको लयमा छ । इन्टरः च्याम्पियन्स लिगमा पछिल्ला पाँच खेलमा गोल गरेको छ । अवे मैदानमा चार जित, दुई बराबर र एक हारको नतिजा निकालेको छ । हाल तीन खेलको अवे अपराजित लयमा छ ।