धादिङ । पहिले पहिले दुर्गमका विद्यालयहरुमा खेताला शिक्षक राख्ने प्रचलन अत्याधिक थियो । देश संघियतामा गएसँगै स्थानीय तह स्थापना भएपछि यो क्रम करिब करिब शुन्य भएको अवस्था हो । किनकी शिक्षक व्यवस्थापनको अधिकार अहिले स्थानीय तहले पाएको छ । 

खेताला शिक्षक राख्ने प्रवित्ति पछिल्लो समय शुन्य हुदै गएपनि धादिङको बेनिघाट रोराङ गाउँपालिकामा रहेको एक विद्यालयमा भने अनौठो प्रवित्ति देखिएको छ । बेनिघाट रोराङ गाउँपालिकाको वडा नं. २ स्थित लाइपुरमा रहेको चण्डिदेवी आधारभुत विद्यालयमा कार्यालय सहयोगीको समेत खेताला कार्यालय सहयोगी राखिएको पाईएको छ । 
उक्त विद्यालयमा कार्यालय सहयोगीको रुपमा २०७५ सालमा नियुक्त भै कार्यरत सोही स्थानका शर्मिला आले मगरले आफ्नो सट्टामा सोही वडाको कार्कीडाडा निवासी सेतीमाया लोहनीलाई कार्यालय सहयोगी राखि काम गराईएको पाईएको छ । उनले भदौ पहिलो सातादेखि दशै अवधिभर करिब दुई महिना विद्यालयमा अनुपस्थित रहि खेताला कार्यालय सहयोगी मार्फत आफ्नो सट्टाको काम गराएको हो । 

भदौ पहिलो सातादेखि विद्यालय नगएका उनले एकैपटक असोजको तेस्रो हप्ता अर्थात दशैं विदापछि विद्यालय खुलेपछि बल्ल विद्यालयमा हाजिर गर्न पुगेकी थिइन् । त्यसपछि पनि ३ दिन विद्यालयमा हाजिर भै पुनः असोज २६ गतेदेखि काठमाण्डौ गएर विद्यालयमा अनुपस्थित भएकी छिन् । यो समाचार तयार पार्दासम्म उनी विद्यालयमा हाजिर हुन गएकि छैनन् भने तिहार अघि विद्यालय खुल्ने दिन कार्तिक २ गते आईतबार एक दिन मात्र रहेको छ । 

हामीलाई प्राप्त सूचना अनुसार उक्त विद्यालयका कार्यालय सहयोगी शर्मिला आले मगर ललितपुरको एक कन्सल्टेन्सीमा जापानिज भाषा कक्षामा भर्ना भै पढिरहेकी छिन् । विगत ३ महिनादेखि उनी उक्त कन्सल्टेन्सीमा पढिरहेकोले विद्यालयमा अनुपस्थित भएकी हुन् । 

उनी लामो समयदेखि विद्यालयमा उपस्थित नभएको र आफ्नो सट्टामा खेताला कार्यालय सहयोगी राखेको विषयमा उनको व्यक्तिगत मोबाईल नम्बरमा सम्पर्क गरेर कुराकानी गर्दा यो कुरा स्वीकार गरेकी छिन् । कुराकानीको सुरुवातमा बिरामी भएर उपचारको लागि विदा लिइएको बहाना बनाएकी उनलाई हामीले सबैकुराको बेलिविस्तार लगाएर प्रश्न गरेपछि भदौ पहिलो हप्तादेखि ललितपुरमा बसेर जापनिज भाषा पढिरहेको स्वीकार गरेकी हुन् । 

यसरी नियम विपरित तपाईले कसरी छुट्टि लिनु भो र सट्टा कार्यालय सहयोगीको रुपमा अर्कालाई काम गर्न पठाउनुभो भनि गरिएको प्रश्नमा उनले लामो समयदेखि आफुले उक्त विद्यालयमा सेवा दिईरहेको र विदा नलिएकोले अहिले विदा लिएको र आफु नहुदा विद्यालयमा काम गर्न असहज नहोस् भनेर विद्यालयसँगै अनौपचारिक छलफल गरेर आफ्नो सट्टामा अरुलाई काम गर्न लगाईएको र आफ्नो तलब सुविद्याबाट उनलाई पारिश्रमिक दिएको कुरा बताईन् । 

यसरी हेर्दा उनले विद्यालयमा अनुपस्थित भएको सबै दिनको उपस्थितिमा हाजिर गरेको देखिन्छ । यस विषयमा विद्यालयका प्रध्यानाध्यापक भिम बहादुर मगरसँग फोन सम्पर्क गर्दा उनी विद्यालयमा लामो समयसम्म विदामा बसेको र उनको सट्टामा अर्कोले काम गरेको बताए । यसरी नियम विपरित कार्यालय सहयोगीलाई लामो समय विदा दिने र सट्टामा अर्कोले काम गर्न मिल्छ भनी सोधिएको प्रश्नमा प्रध्यानाध्यापक मगरले प्रतिक्रिया दिन सकेनन् । यद्यपी उनले कार्यालय सहयोगी शर्मिला आले मगरले विदामा गै ललितपुरमा जापानिज भाषा पढिरहेको भने स्वीकार गरेका छन् भने उनैले विद्यालयमा अनुपस्थित भएको हाजिर समेत गरेको बताए । 

यसैबिच बेनिघाट रोराङ गाउँपालिकाका शिक्षा शाखाका स्रोतव्यक्ति रामेश्वर पोखरेलसँग प्रतिक्रिया लिदा यस विषयमा आफुलाई थाहा नभएको भन्दै अनविज्ञता प्रकट गरेका छन् । उनले फोन सम्पर्कमा कुरा गर्दै यदि विद्यालयले त्यस्तो काम गरेको भए यो नियमविपरित भएको र भोली नै यस विषमा बुझेर आवश्यक दोषीलाई थप कारबाही अगाडी बढाउने बताए । ‘पहिलो कुरा करारको कर्मचारीले अन्य स्थायी दरबन्दीको शिक्षक सरह विदाको सुविधा पाउदैन, यसैले संचित र लामो विदा पाउने भन्ने नै छैन, त्यस्तै आफ्नो अनुपस्थितिको सट्टा अर्कोलाई काम लगाउनै मिल्दैन यो नियम विपरित हो, यस्तो भएको भए दोषीलाई तत्काल कारवाही हुन्छ’ –उनले भने । 

यस विषयमा हामीले उक्त विद्यालय व्यवस्थापन समितिका अध्यक्ष अप्सरा मगर र सट्टा कार्यालय सहयोगीको रुपमा काम गरेकी सेतिमाया लोहनीसँग सम्पर्क गर्न खोज्दा सम्पर्क हुन सकेन । 

पुनश्चः यस विषयमा हामीले सरोकारवालाहरुसँग गरिएको कुराकानीको रेकर्डका साथै समाचारसँग सम्बन्धि सम्पूर्ण प्रमाणहरु हामीसँग सुरक्षित रहेको व्यवहोरा जानकारी छ ।