आँबुखैरेनी, २३ फागुन । देशभरका स्थानीय तहका ६५ वर्ष भन्दा माथिको ज्येष्ठ नागरिकहरुलाई आजदेखि कोरोना खोप लगाउदैछ। त्यसै अनुरुप स्वास्थ्य कार्यालय तनहुँले जिल्लामा दुई चरणमा कोरोना खोप लगाउदैछ। जसअनुरुप पहिलो चरणमा फागुन २३ गतेदेखि २७ गतेसम्म र दोस्रो चरणमा फागुन २८ गतेदेखि चैत २ गतेसम्म लगाईने भएको छ।

यस्तै पहिलो चरणमा आँबुखैरेनी गाउँपालिका सहित  व्यास नगरपालिका, भानु नगरपालिका, बन्दिपुर गाउँपालिका र देवघाट गाउँपालिकामा खोप कार्यक्रम सञ्चालन गरिने छ ।  दोस्रो चरणमा शुक्लागण्डकी नगरपालिका, भिमाद नगरपालिका ऋषिङ गाउँपालिका, घिरिङ गाउँपालिका र म्याग्दे गाउँपालिकामा लगाइने कार्यक्रम तय गरिएको प्रमुख अधिकारीले बताए । खोप अभियानका लागि स्वास्थ्य कार्यालयले २६६ जना स्वास्थ्यकर्मी, ४२५ जना स्वयंसेवकहरुलाई तयार गरिएको जिल्ला स्वास्थ्य प्रमुख शंकरबाबु अधिकारीले जानकारी गराए । 

यस्तै, आकस्मिकताका आधारमा स्वास्थ्यकर्मी परिचालन गर्नका लागि विशेष ईएफआई व्यवस्थापन टोली समेत गठन गरिएको स्वास्थ्य कार्यालय तनहुँका फोकल पर्सन विरेन्द्र चौधरीले जानकारी गराए। तनहुँका ८५ वटा वडाका ९४ वटा स्वास्थ्य कार्यालयबाट लगाइने कोभिडशिल्ड खोप उपलब्धताको आधारमा ५५ वर्ष माथिका उमेर समुहका शिक्षकहरु र सवारीचालक तथा सहचालकहरुलाई समेत लगाइने चौधरीले बताए। 

यस्तै, विभिन्न चरणको परिक्षण पश्चात खोप स्वीकृत भएर समुदायमा जान लागेकाले ढुक्क भएर खोप अभियानमा सरिक हुन स्वास्थ्य प्रमुख अधिकारीले आग्रह गरेका छन् । हालम्म कुनै पनि गम्भिर समस्या उत्पन्न नभएकाले यसबाट सबैले पूर्ण सुरक्षाको प्रत्याभूति गर्नुपर्ने अधिकारीको भनाई थियो ।