सीता शर्मा, काठमाडौं, २६ फागुन । कोरोना भाइरसको महामारी पछाडी धेरै युवालाई आफ्नै गाउँमा रोजगारी अवसर हुने तीनै तहका सरकारले बताएका छन् । तर, वैदेशिक रोजगारीबाट फर्किएका र देशमै रोजगारी गुमाएर बसेका धेरै जसो युवा रोजगारी पाउन नसकेको बताउँछन् ।

झापाको दमक नगरपालिकाले युवाहरुलाई कृषिमा आकर्षित गरी स्वरोजगार बनाउनजग्गा भाडामा दिने योजना ल्याएको छ । नगरपालिकाकाले जग्गा भाडामा लिएर खेतिपाती गर्नेलाई कृषि औजार, मल बिउ, दिनुका साथै एकवर्षको जग्गाको भाडा पनि तिरिदिने गरेको छ । अहिले नगरपालिकाले दिएको १२ विगाहा जग्गामा स्थानीय युवाहरुले खेति गरिरहेका छन् । यसवर्ष नगरपालिकाले थप १३ विगाहा जग्गा भाडामा दिने गरी योजना बनाएको छ ।

अर्घाखाँचीको भुमिकास्थान नगरपालिकाले कोरोना महामारीका कारण रोजगारी गुमाएका युवाहरुलाई पशुपालनमा जोड दिंदै सहयोगको योजना बनाएको छ । नगरपालिकाले यो वर्ष युवाहरुको माग बमोजिम बाख्रा वितरण गर्दैछ । ४० लाख बराबरको बाख्रा वितरण गर्ने युवाहरुलाई व्यवसायिक बाख्रा पालनमा सम्लग्न गराउने योजना रहेको नगरपालिका उपप्रमुख खडानन्द बेल्वासेको भनाइ छ ।

दैलेखको गुँरास गाउँपालिकाले विकास कार्यदल बनाएर पालिका भित्रका विकास निमार्णमा युवाहरुलाई समावेश गरेको छ । स्थानीय एक सय ५२ जना युवा विकास दलमा रहेर काम गरीरहेका छन् । यताझापाको अर्जुनधारा नगरपालिकाले भने रोजगारी खोज्न आउने युवाहरुलाई प्रधानमन्त्री स्वरोजगार कार्यक्रम मार्फत विभिन्न काममा लगाउने गरेको बताएको छ तर नगरपालिका भित्र रोजगारी खोज्ने युवा कम भएको नगर प्रमुख हरी राना बताउनुहुन्छ ।

हरेक दिन नेपालबाट रोजगारी खोज्न एक हजार भन्दा धेरै युवा विदेशिने गरेका छन् । युवाहरुको रोजाईका आधारमा स्थानीय तहले रोजगारीको सिर्जना गर्न सके काम खोज्दै विदेशिनु पर्ने दर कम हुने विज्ञहरु बताउँछन् ।