मालिक बन्ने ठाउँ रास्वपा होइन : सभापति रवि लामिछाने

इच्छाकामना न्युज

१४, बैशाख २०८३

मालिक बन्ने ठाउँ रास्वपा होइन : सभापति रवि लामिछाने

काठमाडौँ

राष्ट्रिय स्वतन्त्र पार्टी(रास्वपा)का सभापति रवि लामिछानेले मालिक बन्नेहरूका लागि रास्वपा उपयुक्त नभएको बताएका छन् । लामिछानेले रास्वपा सांसद विश्वराज पाेखरेललाई लक्षित गर्दै यस्ताे बताएका हुन् । ओखलढुङ्गाबाट निर्वाचित रास्वपाका उम्मेदवार विश्वराज पोखरेलले केही दिनअघि जिल्लाको एक पालिकामा प्रधानाध्यापकले आफूलाई स्वागत नगरेको विषयमा थर्काएका थिए ।

प्रधानाध्यापकमाथि पोखरेलले देखाएको व्यवहारबारे सर्वत्र आलोचना भएपछि उनले क्षमा समेत मागेका थिए । त्यसै विषयमा सोमबार सञ्चारकर्मीले सोधेको प्रश्नको जवाफ दिँदै रविले भने,‘जसलाई मालिक हुन मन छ, त्यसका लागि रास्वपा होइन । हामी मालिक होइनाैँ, सेवक हौँ । यो हेक्का सबैलाई हुनुपर्छ । मालिक हुन मन हुनेहरूको लागि अन्य कुनै ठाउँ होला ।’

यद्यपि उनले सार्वजनिक रूपमै क्षमा आइसकेको अवस्थामा अरू साथीहरूलाई पनि हेक्का रहोस् भनेर सचेत गराएका छन् । लामिछानेले आफूहरू मालिक हुन मन भएर नभई सेवक हुन राजनीतिमा आएको जिकिर समेत गरे ।

‘सबै साथीहरूले यसैलाई मध्यनजर गर्नुहोला । यस्ता खालका अभिव्यक्ति मानसपटलमा भए पनि अभिव्यक्त हुन सक्दैन’, उनले भने । यसैगरी सिन्धुलीमा प्रहरी हिरासतमै एक दलित व्यक्तिको मृत्यु भएको प्रकरणमा रास्वपा सांसद खगेन्द्र सुनारले दिएको अभिव्यक्तिलाई लिएर लामिछानेले पीडाको अभिव्यक्ति सुन्नुपर्ने बताए।