दमौली (तनहुँ) 

तनहुँको बन्दीपुर गाउँपालिका–४ मा स्काइपिक एड्भेन्चर पार्क लिमिटेडले ९७ मिटर लम्बाइको क्यान्टिलिभर ग्लास स्काइ वाक निर्माण गर्ने भएको छ ।

परियोजनाअन्तर्गत दुई सय मिटर गहिराइबाट सञ्चालन हुने बञ्जी जम्प, दुई सय मिटर लामो सोप स्वीङ, अत्याधुनिक जीप कोस्टर, आकाशमै भोजन गर्ने सुविधासहितको फ्लाई डाइनिङ तथा विद्यार्थी र बालबालिकाका लागि आधुनिक प्रविधियुक्त प्लानेटरियम निर्माण गर्ने लक्ष्य राखिएको छ ।

यस्तै रु एक अर्ब ७० करोड बराबरको एकीकृत पर्यटन पूर्वाधार विकास योजनाअन्तर्गत नेपालकै अग्लो ५५ मिटर क्याप्सुल लिफ्ट, स्काइ ग्लास डेक, मेटल क्लाइम्बिङ, रक क्लाइम्बिङ, भ्यूज रूम तथा १४० फिट अग्लो आदियोगी शिवको मूर्तिसहित आदियोगी पार्क निर्माण गरिरहेको जनाइएको छ ।

परियोजनामा बन्दीपुर केबलकार एण्ड टुरिजम लिमिटेड, टुरिजम इन्भेष्टमेन्ट फण्ड लिमिटेड, आरकेडी होल्डिङ्स लिमिटेड, पन्चासे नेक्सस इन्फ्रा लिमिटेड लगायतका संस्थागत लगानीकर्तासहित करिब एक हजार पॉच सय जना लगानीकर्ताको सहभागिता रहेको प्रबन्ध सञ्चालक पोष्टबहादुर खड्काले जानकारी दिनुभयो ।

उहाँका अनुसार यो परियोजनाले नेपाललाई विश्वस्तरीय साहसिक पर्यटन गन्तव्यको रूपमा स्थापित गर्नुका साथै आन्तरिक तथा बाह्य पर्यटन प्रवद्र्धन, रोजगारी सिर्जना र स्थानीय आर्थिक गतिविधिमा महत्वपूर्ण योगदान पु¥याउनेछ ।

सञ्चालक रेखा बानियाँले यस परियोजनाले बन्दीपुरको पर्यटन क्षेत्रलाई थप गुलजार बनाउने विश्वास व्यक्त गर्नुभयो । सञ्चालक एवं बन्दीपुर गाउँपालिकाका पूर्वअध्यक्ष पूर्णसिंह थापाले यस परियोजनाले बन्दीपुरलाई अन्तरराष्ट्रिय क्षेत्रमा नयाँ पहिचान दिलाउने बताउनुभयो । रासस