पदमपुर । कालिका नगरपालिकाले नगरक्षेत्रभित्रका बालबालिकालाई अनिवार्य तथा निःशुल्क शिक्षा प्रदान गर्ने तयारी थालेको छ । आधारभूत तहका सबै बालबालिकालाई उक्त कार्यक्रममा सहभागी गराउने तयारी थालेको हो ।

संविधानको धारा ३१ अन्तर्गत व्यवस्था गरिएको शिक्षासम्बन्धी मौलिक हक तथा अनिवार्य एवम् निःशुल्क शिक्षासम्बन्धी कार्यविधिअनुसार चारदेखि १३ वर्ष उमेर समूहका सबै बालबालिकालाई शिक्षाको पहुँचमा ल्याउने उद्देश्यसहित वडा तहबाट अभियान सुरू गरिएको कालिका नगरपालिकाका प्रमुख विनोद रेग्मीले जानकारी दिए । उनका अनुसार वडा नं–४ बाट अभियानको सुरूवात गरिएको छ । जसअन्तर्गत ‘अनिवार्य तथा निःशुल्क शिक्षा वडा घोषणा’का लागि सामूहिक प्रतिबद्धतापत्रमा हस्ताक्षरसमेत गरिएको थियो ।

बागमती प्रदेश सरकारसँग सम्झौता भइसकेकोले कार्यक्रम सुरू गरिएको उनले बताए । ‘आर्थिक अभावका कारण कुनै पनि बालबालिका विद्यालय जानबाट वञ्चित नहून् भन्ने उद्देश्यले स्थानीय सरकारले जिम्मेवारीपूर्वक काम गरिरहेको छ’, नगरप्रमुख रेग्मीले बताए । वडा तहबाट प्रतिबद्धता अभियान सञ्चालन गरी नगरस्तरीय घोषणा कार्यक्रममार्फत योजनालाई प्रभावकारीरुपमा अघि बढाइने उनको भनाइ छ ।

उपप्रमुख विमला तामाङका अनुसार स्थानीय सरकारले शिक्षा विकासलाई सुरूदेखि नै प्राथमिकतामा राख्दै आएको छ । ‘मेयर केयर’, ‘बालबालिकासँग उपमेयर’लगायतका कार्यक्रम यसअघि नै सञ्चालन भइसकेको बताउँदै उनले भनिन्, ‘स्थानीय सरकारले शिक्षा क्षेत्रको विकासमा निरन्तर काम गरिरहेको छ, माध्यमिक तहसम्म नै निःशुल्क गराउने योजना छ ।’

पालिकाहरुको आर्थिक स्थितिलाई हेरेर हाल आधारभूत तहसम्म पूर्णरुपमा निःशुल्क गराउने प्रयास गरिएको उनले बताइन् । कालान्तरमा माध्यमिक तहसम्मका शैक्षिक विकासमा काम गर्ने योजना रहेको उनले बताइन् । पालिकाका प्रमुख प्रशासकीय अधिकृत देवराज चौलागाईंले संविधानले व्यवस्था गरेको अधिकारलाई व्यवहारमा कार्यान्वयन गरेको बताए । कार्यक्रम वडा नं–४ का अध्यक्ष तथा सामाजिक विकास समितिका संयोजक मकरमान श्रेष्ठको अध्यक्षतामा सुरू भएको हो ।