आँबुखैरेनीको नीति तथा कार्यक्रम सार्वजनिक: स्वास्थ्य,शिक्षा,कृषि र पर्यटनमा विशेष जोड

इच्छाकामना न्युज

३, आषाढ २०८३

आँबुखैरेनीको नीति तथा कार्यक्रम सार्वजनिक: स्वास्थ्य,शिक्षा,कृषि र पर्यटनमा विशेष जोड

आँबुखैरेनी। आँबुखैरेनी गाउँपालिकाले आर्थिक वर्ष २०८३/०८४ का लागि स्वास्थ्य, शिक्षा, कृषि, पर्यटन, युवा रोजगारी, सीप विकास, पूर्वाधार निर्माण तथा सामाजिक सुरक्षालाई प्राथमिकतामा राख्दै नीति तथा कार्यक्रम सार्वजनिक गरेको छ।

गाउँपालिकाले समृद्ध र आत्मनिर्भर आँबुखैरेनी निर्माणको लक्ष्यसहित आँबुखैरेनी अस्पतालको स्तरोन्नति, विपन्न नागरिकको निःशुल्क उपचार, चेपाङ समुदायका लागि निःशुल्क स्वास्थ्य बिमा, प्रविधिमैत्री विद्यालय, उच्च शिक्षाको विस्तार तथा खेलकुद पूर्वाधार विकासका कार्यक्रम अघि सारेको छ।

त्यस्तै उत्पादनमा आधारित कृषि अनुदान, पशु तथा बाली बिमा, पर्यटन क्षेत्रको प्रवर्द्धन, सडक, खानेपानी तथा सिँचाइ विस्तारलाई आगामी वर्षका प्रमुख कार्यक्रमका रूपमा समेटिएको छ।

महिला, बालबालिका, ज्येष्ठ नागरिक, अपाङ्गता भएका व्यक्ति तथा विपन्न समुदायलाई केन्द्रमा राखेर सामाजिक न्याय, समानता र समावेशी विकासका कार्यक्रम सञ्चालन गरिने जनाइएको छ। साथै वातावरण संरक्षण, फोहोरमैला व्यवस्थापन, विपद् तयारी तथा सांस्कृतिक सम्पदाको संरक्षणलाई पनि विशेष प्राथमिकता दिइएको छ।

“पर्यटन, कृषि, उद्यम र पूर्वाधार : सुखी र समृद्ध आँबुखैरेनीको आधार” तथा “शिक्षा,स्वास्थ्य र सामाजिक सुरक्षाको महत्व : आँबुखैरेनी गाउँपालिकाको दायित्व” भन्ने मूल नारासहित गाउँपालिकाले नागरिकमुखी, उत्तरदायी र विकासमुखी कार्यक्रम कार्यान्वयन गर्ने प्रतिबद्धता जनाएको छ।