चितवनलाई चेसमा दुई स्वर्ण, समग्रमा दोस्रो स्थान

चितवन। प्रदेश खेलकुद विकास परिषद्द्वारा आयोजित तेस्रो खेलकुद प्रतियोगिताअन्तर्गत असार ३ देखि ९ गतेसम्म सञ्चालन भएको बुद्धिचाल (चेस) प्रतियोगितामा चितवनले उत्कृष्ट प्रदर्शन गर्दै समग्रमा दोस्रो स्थान हासिल गरेको छ।

प्रतियोगिताको महिला तर्फका तीन विधामध्ये प्रतिभाशाली खेलाडी लक्ष्मी कडेलले दुई विधामा स्वर्ण पदक जित्दै चितवनको गौरव बढाएकी छन्। उत्कृष्ट प्रदर्शनका आधारमा उनी ‘बेस्ट प्लेयर’ पुरस्कारबाट समेत सम्मानित हुने भएकी छन्।

पुरुषतर्फ क्लासिक विधामा प्रतिस्पर्धा गरेका राजु त्रिपाठीले उत्कृष्ट खेल प्रदर्शन गर्दै पाँचौँ स्थान हासिल गरेका छन्। उक्त उपलब्धिसँगै उनले सान्त्वना पुरस्कार पनि प्राप्त गरेका छन्।

चितवन टोलीको नेतृत्व टिम म्यानेजर तथा चितवन जिल्ला बुद्धिचाल संघका अध्यक्ष मोहन श्रेष्ठले गरेका थिए। टोलीको समन्वय, रणनीति र खेलाडीहरूको मेहनतले चितवनलाई समग्र बुद्धिचाल प्रतियोगितामा दोस्रो स्थान दिलाउन महत्वपूर्ण योगदान पुगेको बताइएको छ।

यस उपलब्धिबारे प्रतिक्रिया दिँदै अध्यक्ष श्रेष्ठले खेलाडीहरूको निरन्तर मेहनत, अनुशासन र समर्पणकै परिणामस्वरूप यो सफलता हासिल भएको बताए। उनले आगामी दिनमा चितवनलाई राष्ट्रियस्तरको बुद्धिचाल खेलमा अझ सशक्त रूपमा स्थापित गर्ने लक्ष्य रहेको पनि उल्लेख गरे।