देवघाट । तमू ह्युल छोज धीं गुरुङ राष्ट्रिय परिषद् देवघाट गाउँपालिका इकाईको आयोजना तथा देवघाट गाउँपालिकाको संरक्षकमा देवघाटमा तमू (गुरुङ) संस्कारअन्तर्गतको छ्याटु (स्यार्गा) नाच प्रशिक्षण कार्यक्रम सुरु भएको छ। गुरुङ समुदायको मौलिक संस्कार,संस्कृति,परम्परा र पहिचानको संरक्षण गर्दै नयाँ पुस्तालाई आफ्नो संस्कृतिसँग जोड्ने उद्देश्यले असोज १८ गतेदेखि देवघाट गाउँपालिका–५, घिनाटारमा प्रशिक्षण सुरु गरिएको हो।

छ्याटु (स्यार्गा) नाच गुरुङ समुदायका लागि केवल मनोरञ्जनका लागि प्रस्तुत गरिने नाच मात्र नभई समुदायको मौलिक संस्कार,परम्परा,सांस्कृतिक पहिचान र पुस्तौँदेखि हस्तान्तरण हुँदै आएको ज्ञानसँग जोडिएको महत्वपूर्ण सांस्कृतिक विधाका रूपमा लिइन्छ। विशेषगरी गुरुङ समुदायका संस्कार तथा सांस्कृतिक अवसरहरूमा यसको आफ्नै महत्व रहेको छ। आधुनिक पुस्ताको बढ्दो प्रभावसँगै कतिपय मौलिक संस्कार तथा सांस्कृतिक अभ्यासहरू ओझेलमा पर्दै गइरहेका बेला छ्याटु (स्यार्गा) नाचको प्रशिक्षणले पुरानो पुस्तासँग रहेको सांस्कृतिक ज्ञान र सीपलाई नयाँ पुस्तासम्म पुर्‍याउन महत्वपूर्ण भूमिका खेल्ने अपेक्षा गरिएको छ।

प्रशिक्षणमार्फत युवापुस्तालाई गुरुङ समुदायको मौलिक संस्कार र संस्कृति बुझाउने, नाचका विधि तथा परम्परागत शैली सिकाउने र भावी पुस्ताका लागि यसको संरक्षण गर्ने लक्ष्य राखिएको आयोजकले जनाएको छ। गुरुङ समुदायको भाषा,भेषभूषा,संस्कार,संस्कृति,गीत–संगीत तथा नाच नै समुदायको मौलिक पहिचानका आधार भएकाले यस्ता सांस्कृतिक विधाको संरक्षण र पुस्तान्तरण आवश्यक रहेको आयोजकको भनाइ छ। छ्याटु (स्यार्गा) नाचको नियमित प्रशिक्षणले गुरुङ समुदायको मौलिक संस्कृतिलाई जीवन्त राख्नुका साथै नयाँ पुस्तामा आफ्नो संस्कार र पहिचानप्रति अपनत्व बढाउन सहयोग पुग्ने विश्वास गरिएको छ।

तमु ह्युल छोज धीं गुरुङ राष्ट्रिय परिषद् देवघाट इकाईका अध्यक्ष भुवन सिं गुरुङले छ्याटु (स्यार्गा) नाच गुरुङ समुदायको संस्कार र सांस्कृतिक पहिचानसँग जोडिएको महत्वपूर्ण नाच भएकाले यसको संरक्षण र पुस्तान्तरण आवश्यक रहेको बताए। “हाम्रा पुर्खाले जोगाउँदै ल्याएको मौलिक संस्कार र संस्कृतिलाई नयाँ पुस्तासम्म पुर्‍याउनु हाम्रो जिम्मेवारी हो। पछिल्लो समय आधुनिकताका कारण कतिपय मौलिक संस्कार र संस्कृति ओझेलमा पर्दै गएका छन्। त्यसैले छ्याटु (स्यार्गा) जस्ता मौलिक सांस्कृतिक विधाको प्रशिक्षणमार्फत युवापुस्तालाई आफ्नो संस्कार र पहिचानसँग जोड्ने हाम्रो उद्देश्य हो,” उनले भने। उनले प्रशिक्षणलाई एउटा नाच सिकाउने कार्यक्रमका रूपमा मात्र नभई गुरुङ समुदायको संस्कार,संस्कृति र पहिचान संरक्षण गर्ने अभियानका रूपमा अघि बढाउनुपर्ने बताए। “आज हामीले सिकाएको कुरा भोलिको पुस्ताले सिक्ने र सिकाउने वातावरण बनाउन सक्यौँ भने मात्र हाम्रो मौलिक संस्कार जीवित रहन्छ,” उनले भने।