काठमाण्डौ, २७ चैत । दृष्टिविहीनहरूको सुविधाका लागि सरकारी तथा गैरसरकारी निकायबाट योजना निर्माण र कार्यान्वयन भइरहेको छ । यसको प्रभावको लेखाजोखा भइरहँदा दृष्टिविहीनहरूले बैँकिङ् सेवामा भने पहुँच नपुगेको गुनासो वर्षौँदेखि गर्दै आएका छन् ।

गोरखा नगरपालिका वडा नम्बर १२ का शिक्षक भरतप्रसाद सुवेदी पूर्ण दृष्टिविहीन हुनुहुन्छ । उहाँको बैंक खाता छ तर अनलाइन बैङ्किङ्ग सुविधा नपाएपछि शेयर किनबेच गर्न नपाएको उहाँको भनाइ छ ।

इटहरी नगरपालिका ७ का रमानन्द खत्वे पेशाले शिक्षक हुनुहुन्छ । साविकको त्रिवेणी विकास बैंकबाट ३ लाख रुपैयाँ ऋण लिएर समयमैं तिर्नुभयो तर त्यही बैंक गाभिएर बनेको ग्लोवल आइएमइ बैंकमा आवेदन दिनुभयो । तर दृष्टिविहीन भएकै कारण ऋण दिन नसकिएको बैकले जवाफ दिएकोमा उहाँको चित्त दुखेको छ ।

नेपाल राष्ट्र बैंकले फरक क्षमता भएका व्यक्तिहरुलाई सजिलै बैंङ्कि सुविधा उपलब्ध गराउन सबै बैंक तथा वित्तीय संस्थालाई एकीकृत निर्देशन दिइसकेको छ । बैंकहरुले एटिएम सुविधाका लागि समेत विशेष व्यवस्था गर्नु पर्ने प्रवक्ता देवकुमार ढकालबताउनुहुन्छ ।

बैँक प्रयोगमा समस्या भएको भन्दै दृष्टिविहीनले दिएको उजुरी तथा गुनासोको एकीन तथ्याङ्क राष्ट्र बैंकसँग पनि छैन । निर्देशन नमान्ने बैंक तथा वित्तीय संस्थालाई भने नेपाल राष्ट्र बैंक ऐन २०५८ बमोजिम कारवाहीको व्यवस्था छ । नेपाल नेत्रहीन संघका अनुसार देभभर ९४ हजार ६ सय ६५ जना दृष्टिविहीन छन् ।

बैँकमा खाता खोल्नै समस्या र खाता खुले पनि चेकबाट रकम निकाल्ने बेलामा हस्ताक्षर नमिलेको भन्दै बैँकले दृष्टिविहीनलाई अझैँ पनि फर्काउने गरेका छन् ।