देवचन्द्र भट्ट, नुवाकोट, ३० चैत । वजार पाएसंगै हिमाली भेग रसुवामा सिमि खेति वढ्दै गएको छ । स्थानीय जातको सिमीले राम्रो बजार पाउन थालेपछि रसुवाको उत्तरी भेगमा रहेको गत्लाङका किसान सिमि खेतितर्फ निकै आकर्षित भएका हुन् ।सिमी उत्पादन गर्ने कृषकको सङ्ख्या बढ्दै जाँदा उत्पादन पनि बढ्दै गएको छ ।

त्यहां उत्पादित सिमिले रसुवाको धुन्चे, स्याफ्रुवेशी तथा नुवाकोटमासमेत वजार पाउन थालेको छ ।आन्तरिक तथा वाह्य पर्यटकहरुलेसमेत रुचाएको सिमि यस वर्ष सो स्थानमा  २५ मेट्रिक टन सिमी उत्पादन भएको कृषि ज्ञान केन्द्र रसुवा शाखा कार्यालयले जनाएको छ । कार्यालयका अनुसार गत वर्ष २० मेट्रिक टन सिमी उत्पादन भएकोमा यो वर्ष ५ मेट्रिक टन सिमी उत्पादन बृद्धि भएको हो ।

रसुवाको पश्चिमी भेगमा रहेको आमाछोदिङ्मो गाउँपालिकाको वडा नम्बर ३ मा रहेको पर्यटकीय स्थल गत्लाङमा स्थानीय जातका दलहन बाली लगाउने गरिएको छ । स्थानीय कृषि उपजको माग बढी भएको र मूल्य पनि राम्रो पाउने भएपछि कृषक स्थानीय जातको उत्पादनतिर आकर्षिक हुन थालेका गत्लाङका किसानहरुले वताएका छन्  ।

स्थानीय सिमीले राम्रो बजार पाउन थालेपछि सिमी उत्पादनतर्फ कृषकको आकर्षण बढ्दै गएको कृषक हरिसिह लामाको भनाई छ । उहाँका अनुसार सिमिले स्थानीयबासीको जीविकोपार्जनमा धेरै सहयोग समेत पुगेको छ । किसानले खेती विस्तार गरेसगै सिमी उत्पादन बढेको कृषक तथा व्यवसायीले बताएका छन् ।  

पाच वर्षअघि सिमी संकलन गर्दा १५ मेट्रिक टन भएकोमा हाल उत्पादन बढेर २५ मेट्रिक टन पुगिसकेको छ । सिमि खेती गर्ने किसानको सङ्ख्या समेत बृद्धि भएको छ । हाल एकसय ५० भन्दाबढी किसानले सिमीलाई व्यवसायिक खेती बनाउदै आइरहेका छन् ।

गत्लाङमा १५ हेक्टर क्षेत्रफलमा सिमी खेती हुँने गरेको कृषि ज्ञान केन्द्र नुवाकोट अन्तरगत धुञ्चे शाखाले जनाएको छ । रसुवाको गत्लाङ, हाकु, गोेल्जुङ, स्याफ्रु, चिलिमेलगायतका क्षेत्रमा व्यावसायिक रुपमा सिमी खेती हुने गरेको छ ।