गोरखाका आशिषको युवती विवादमा हत्या भएको खुलासा, मुख्य अभियुक्तसहित ४ जना पक्राउ

इच्छाकामना न्युज

२१, कार्तिक २०७७

गोरखाका आशिषको युवती विवादमा हत्या भएको खुलासा, मुख्य अभियुक्तसहित ४ जना पक्राउ

गोरखा, २१ कार्तिक
गत कार्तिक १४ गते काठमाडौंमा छुरा प्रहार गरी हत्या गरिएका आशिष मगरको युवती विवादका कारण ज्यान गएको खुलासा भएको छ । आशिषमाथि काठमाडौं धापासीमा छुरा प्रहार भएको थियो ।गोरखा, अजिरकोट–५ घर भएका २४ वर्षीय आशिष छुरा प्रहारबाट गम्भीर घाइते भएका थिए । उनको उपचारका क्रममा चिरायु अस्पतालमा मृत्यु भएको थियो ।उनको मृत्यु भएलगत्तै उनीमाथि आक्रमण गर्ने व्यक्ति फरार भएका थिए । हत्या आरोपीमध्ये टोखा बस्ने २६ वर्षीय राम श्रेष्ठ, स्याङ्जा गल्याङ–३ बस्ने २७ वर्षीय रवि थापा र संखुवासभा १९ वर्षीय दोर्जे शेर्पालाई प्रहरीले कार्तिक १६ गते पक्राउ गरी सार्वजनिक गरिसकेको थियो ।प्रहरीले मुख्य आरोपी उदयपुर गाईघाटका २० वर्षीय रुपेश आले मगरलाई धरानको भानुचोकबाट पक्राउ गरी काठमाडौं ल्याएको छ । महानगरीय अपराध महाशाखाको टोलीले उनलाई पक्राउ गरेको हो ।रुपेश पक्राउ परेसँगै आशिष र रुपेशको समूहबीच युवतीको विषयमा विवाद हुँदा आक्रमण भएको थाहा लागेको छ । युवतीको विषयमा सुरु भएको विवाद ठूलो बनेर छुरा प्रहार भएको र आशिषको ज्यान गएको प्रहरी अनुसन्धानमा खुलेको छ ।रुपेशको समूहले लागूऔषध प्रयोग गर्ने गरेको र धापासी क्षेत्रमा गुण्डागर्दीमा संलग्न रहेको पनि प्रहरी अनुसन्धानमा खुलेको छ । आफ्नो पकड जमाउनका लागि उनीहरुले आशिषको हत्या गरेका पनि हुनसक्ने भन्दै प्रहरीले त्यसतर्फ पनि अनुसन्धान सुरु गरेको महाशाखाले जनाएको छ ।