काठमाडौं, २६ कात्तिक । नेपालमा पहिलो पटक १२ वर्ष भन्दा माथिका दीर्घरोगी बालबालिकालाई कोभिड १९ विरुद्धको फाइजर खोप लगाईदै छ । कोभ्याक्स सुविधा मार्फत अमेरिकाले उपलब्ध गराएको एक लाख मात्रा खोप देशभरका २४ वटा अस्पतालबाट लगाइने छ । 
स्वस्थ मानिसको तुलनामा दीर्घरोगीलाई कोरोना भाइरसले बढि असर गर्ने भन्दै सरकारले दीर्घरोगी र ज्येष्ठ नागरिकबाट खोप लगाउन सुरु गरेको थियो । धेरैजसो बयस्कहरुले खोप लगाईसकेका छन् । अब बालबालिकालाई लगाउन मिल्ने फाइजर खोप पहिलो चरणमा देशभरका दीर्घरोगी बालबालिकाबाट सुरु गरिंदै छ । यसले दीर्घ रोगी बालबालिकालाई कोरोना सङ्क्रमणबाट बचाउन मद्धत गर्ने बालरोग विशेषज्ञ डाक्टर अनवेश भट्ट बताउनुहुन्छ । 
नेपालमा खोप अभियान सुरु भएदेखि हालसम्म १ करोड ६२ लाख ३३ हजार १ सय ५५ मात्रा खोप लगाइएको छ । दुवै मात्रा पुरा गरेमा ९५ प्रतिशतसम्म प्रभावकारी हुने फाइजर खोपको पहिलो मात्रा आउँदो पर्सि आइतबार अर्थात कार्तिक २८ देखि मङ्सिर ४ गतेसम्म दीर्घरोगी बालबालिकालाई लगाइने स्वास्थ्य तथा जनसङ्ख्या मन्त्रालयका प्रवक्ता डाक्टर कृष्ण पौडेलले जानकारी दिनुभयो । 
फाईजरले विश्व स्वास्थ्य सङ्गठन र नेपाल सरकारबाट समेत आकस्मिक प्रयोगका लागि अनुमति पाएको छ । खोप लगाउन जाँदा अस्पताल वा चिकित्सकले जारी गरेको उपचार सम्बन्धी पुर्जा अनिवार्य लिएर सरकारले तोकेका अस्पताल जानुपर्नेछ । खोप काठमाडौँ उपत्यकाभित्रका वीर अस्पताल, त्रिवि शिक्षण अस्पताल, निजामती सेवा अस्पताल, सहिद गंगालाल हृदय केन्द्र, भक्तपुर क्यान्सर अस्पताल, पाटन अस्पताल, सहिद धर्मभक्त राष्ट्रिय प्रत्यारोपण केन्द्र र उपत्यका बाहिरका १६ अस्पतालबाट लगाइनेछ ।