समिना रञ्जितकार, विरगञ्ज, २३ पुस । सरकारले बारा जिल्लालाई माछाको पकेट क्षेत्र घोषणा गरेपनि उत्पादन लागत अनुसारको मुनाफा पाउन नसकेको किसानहरूले बताएका छन् । सरकारले पहिचान गरेको माछाको सुपरजोन क्षेत्रमा नै माछापालनबाट गतिलो आम्दानी नभएको उनीहरूको भनाइ छ । माछालाई खुवाउने दानाको मूल्य आकाशिनुका साथै मजदुर समेत अभाव हुँदा माछा उत्पादनमा लागत बढ्ने गरेको किसान रामकिशोर यादवले गुनासो गर्नुभयो । 

पाँच वर्ष अगाडि दानाको मूल्य प्रतिकिलो २८ रुपैयाँ रहेकोमा अहिले मूल्य बढेर ५२ रुपैयाँ पुगेको छ । पोखरीबाट माछा झिक्ने माझीहरूले प्रत्येक पटक उत्पादित माछाबाट दश प्रतिशत लिने चलन यथावत् रहेको र व्यापारीहरूले पनि पाँच किलोमा डेढ किलो बढी लिने गरेको किसानहरू बताउँछन् । 

यस्तै कारणले माछा पालनमा समस्या भोगिरहेको अर्का किसान सिकन्दर साहले बताउनुभयो । प्रधानमन्त्री कृषि आधुनिकीकरण कार्यान्वयन एकाइ परियोजना सुपरजोनका पूर्व अध्यक्ष जालन्धर सिंहले बारामा माछा उत्पादन बढेको तर बजार नबढेका कारण समस्या भएको बताउनुभयो । बारा जिल्लाको सिम्रौनगढ, बोधवन, पचरौता र कोल्हवीमा सबैभन्दा बढी माछापालन हुने गरेको छ । बारा जिल्लामा सबैभन्दा बढी सिम्रौनगढ क्षेत्रमा माछा उत्पादन हुँदै आएको छ । 

माछापालनमा आइरहेको समस्याको समाधान गर्न आफुहरूले विभिन्न योजनाहरू बनाइरहेको प्रधानमन्त्री कृषि आधुनिकीकरण कार्यान्वयन एकाइ परियोजना सुपरजोनका कृषि अधिकृत दीपकुमार मित्रले बताउनुभयो । नेपालमा कुल माछाको मागमध्ये पैंतीस प्रतिशत बारा जिल्लाबाट पूर्ति हुने गरेको छ । बारामा हाल १२ वटा ह्याचरी र एक हजार ६ सय २५ वटा पोखरी रहेका छन् ।