उषा तामाङ, काठमाडौँ, ३ फागुन । कोरोना महामारीको दुइ वर्षभन्दा धेरै समय नेपालमा मोबाइलबाटै रकम लिनदिन र निकाल्ने सुविधा लोकप्रिय भयो । कोरोना संक्रमणको जोखिम नहोस् भन्दै राष्ट्र बैँकले पनि सेवा प्रदायक तथा बैङ्कहरूसँग समन्वय गरिदियो । प्रयोगकर्ताको माग बढ्दैजाँदा अब भने मोबाइल बैँकिङमार्फत नै बैँक तथा वित्तीय संस्थाबाट ऋण माग्न पाइने भएको छ ।

रकम थोरै वा धेरै भए पनि बैङ्कहरूमा ऋण लिन जाँदा प्रक्रिया झन्झटिलो हुने गुनासो सेवाग्राहीको हुन्छ । तर अब मोबाइलबाटै ऋणका लागि बैँकमा अनुरोध गर्न पाइने सुनेपछि जनकपुरका अशोक साहलाई खुसी लागेको छ । नेपालमै पहिलो पटक नबिल बैङ्कले मोबाइलबाटै ऋण लिनेदिने व्यवस्था १ वर्ष अघिदेखि गरेको थियो ।

त्यसपछि लक्ष्मी, कुमारी बैङ्कले पनि यो सुविधाको सुरुवात गरे । हालसम्म आफूहरूले ३ हजारभन्दा धेरैलाई मोबाइल एपमार्फत दिएको आवेदनका आधारमा २ लाख सम्म ऋण दिने गरेको कुमारी बैंकका प्रवक्ता नबिनमुनी बज्राचार्य बताउनुहुन्छ । नेपाल राष्ट्र बैङ्कले तीन दिनअघि विद्युतीय माध्यमबाट प्रवाह हुने कर्जा सम्बन्धी मार्गदर्शन जारी गर्दै बैङ्क वा वित्तीय संस्थाले कर्जा आवेदनदेखि असुलीसम्मको लागि सहजीकरण गर्न सेवा प्रदायक संस्थालाई भनेको छ । सेवाप्रदायक संस्थामा खल्ती, इसेवा लगायत २८ वटा  संस्था छन् ।

तलवी खाता रहेका वा पेशागत तथा व्यावसायिक आय जम्मा हुने खाता रहेका ग्राहकलाई अधिकतम ५ लाखसम्म र अन्य ग्राहकले २ लाख रुपैयाँसम्म यो कर्जा निन पाउने नेपाल राष्ट्र बैङ्कका सह–प्रवक्ता नारायण प्रसाद पोखरेलले सीआइएनसँग बताउनुभयो ।

मोबाइल एपको माध्यमबाट कर्जा लिएका व्यक्तिले एकै पटक वा किस्ताबन्दिमा ३ वर्षसम्म भुक्तानी गर्नुपर्ने हुन्छ । यो व्यवस्थाको सुरुवात गर्नु सकारात्मक भए पनि सेवाग्राहीलाई कारोबारका बारेमा जानकारी दिनुपर्ने बताउनुहुन्छ पूर्व गभर्नर दीपेन्द्र बहादुर क्षेत्री ।

राष्ट्र बैंककाका अनुसार कोरोना महामारी सुरु हुनुअघि महिनामा ९ सय अर्बको विद्युतीय कारोवार हुने गरेको थियो भने हाल यो दर प्रति महिना ५१ सय ४१ अर्ब पुगेको छ । विद्युतीय कारोवार प्रति सेवाग्राही आकर्षित हुँदै गर्दा ऋण लिन र दिन मोबाइल माध्यम बन्न थालेको छ । तर सेवाप्रादायक संस्थाले बैँकले जस्तै झन्झटिलो प्रक्रिया नराखून भन्ने अपेक्षा नागरिकको छ ।