कुरिनटार, २५ फागुन । चितवनको इच्छाकामनामा पनि ११२ औँ अन्तर्राष्ट्रिय श्रमिक महिला दिवस विभिन्न कार्यक्रम गरि मनाइएको छ । सामाजिक न्याय र लैङिगक समानताः दिगो विकासको सुनिश्चितता भन्ने नारा सहित १ सय १२ औं अन्तर्राष्ट्रिय श्रमिक महिला दिवस मंगलबार विभिन्न कार्यक्रम गरि मनाइएको हो ।

यसबैचि गाउँपालिकाको आयोजनामा क्षमता अभिवृद्धि तथा अन्तरकृया कार्यक्रम सम्पन्न गरेको छ । गाउँपालिकाभित्रका विभिन्न महिला संघसंगठन, महिला, आमा समूहरु, जनप्रतिनिधि लगायतको उपस्थितिमा गाउँपालिकाको प्रांगणमा कार्यक्रम सम्पन्न भएको हो ।

कार्यक्रममा बोल्दै गाउँपालिका अध्यक्ष गीता कुमारी गुरुङले इच्छाकामनाका महिलाहरु अग्रपंतीमा रहेको पाइएको बताए । आफुहरु जनप्रतिनिधि भएर आएपछि गाउँगाउँमा महिला शसक्तिकरणका कार्यक्रमहरुलाई प्राथमिकता साथ सञ्चालन गरेकाले महिलाहरु जागरुक हुदैँ गएको अध्यक्ष गुरुङको भनाई छ । अहिले इच्छाकामनाका महिलाहरु कार्यक्रमहरुमा अगाडी आएर निर्धक्क भएर बोल्नका साथै आफ्ना समस्याहरु राख्न सक्ने भएको बताए ।

कार्यक्रममा कार्यपालिका सदस्यहरु दमन कुमारी चेपाङ र निर्मला श्रेष्ठले इच्छाकामना गाउँपालिको नेतृत्वमा पुन महिला नै आउनुपर्नेमा जोड दिए। गाउँपालिका अध्यक्ष गीता कुमारी गुरुङको अध्यक्षतामा सम्पन्न कार्यक्रमको गाउँपालिका राजश्व शाखाका प्रमुख तथा यस कार्यक्रमका संयोजक रीता अर्याल नेपालले सञ्चालन गरेका थिए।

कार्यक्रममा अध्यक्ष गुरुङ सहित उपाध्यक्ष कृतिकुमार श्रेष्ठ, प्रवक्ता सावित्री गुरुङ, वडा नम्बर ४ का वडाध्यक्ष मुक्तिनाथ सिलवाल ,महिला समूहका प्रतिनिधिहरुले मन्तव्य राखेका थिए।