.png)
देवघाट, ११ असार । देवघाट गाउँपालिकाले आर्थिक वर्ष २०७९/८० का लागि ५२ करोड ६ लाख ६४ हजार रूपैयाँबराबरको बजेट ल्याएको छ । शुक्रबार सम्पन्न गाउँसभाबाट पालिकाभित्रको विकासका लागि विभिन्न शीर्षकमा उक्त बजेट ल्याएको हो ।
गाउँपालिकाले आउँदो आर्थिक वर्षका लागि कृषि तथा पशुपक्षी, शिक्षा तथा स्वास्थ्य, भौतिक पूर्वाधार तथा वातावरण तथा विपद् व्यवस्थापनको क्षेत्रलाई प्राथमिकतामा राखेको छ ।
चालू खर्चतर्फ ३३ करोड ४० लाख तीन हजार रूपैयाँ र पुँजीतर्फ १८ करोड ६६ लाख ६१ हजार रूपैयाँ बजेट अनुमान गरिएको गाउँपालिका अध्यक्ष तिलबहादुर थापामगरले जानकारी दिए ।
गाउँपालिकाभित्रको आर्थिक विकासका लागि कृषितर्फ अदुवा तथा बेसारको खेती विस्तार गरी उत्पादन तथा बजारीकरणको व्यवस्था मिलाउने, माटोको गुणस्तर परीक्षण गर्न घुम्ती शिविर, कृषिमा आवश्यक यन्त्र–उपकरणको व्यवस्थापन, मल तथा बीउको व्यवस्था आदिलाई प्राथमिकतामा राखिएको छ ।
यस्तै, पशुपक्षीको उपचारका लागि औषधि उपचारको व्यवस्था, बाख्राको खोर सुधार गरेर बाख्रापालनको पकेट क्षेत्र स्थापित गराउने, पशुपालक कृषकको क्षमता विकासका लागि तालिम तथा लोकल कुखुरा प्रवद्र्धन गर्नका लागि पनि बजेटले प्राथमिकता पाएको छ । दुग्ध क्षेत्रमा पनि लगानी बढाउन गाउँपालिकाले बजेट छुट्टयाएको छ ।
सामाजिक क्षेत्रतर्फ शिक्षा, स्वास्थ्य, खानेपानी तथा सरसफाइका साथै धार्मिक, सांस्कृतिक क्षेत्रको संरक्षण तथा संवद्र्धनसँगै लैङ्गिक समानता तथा सामाजिक समावेशीकरण, युवा तथा खेलकुद र मनोरञ्जनजस्ता सामाजिक पक्षको विकासतर्फ पनि गाउँपालिकाको बजेटले प्राथमिकता पाएको छ । त्यसका लागिमात्रै २३ करोड ८५ हजार रूपैयाँभन्दा बढी बजेट विनियोजन गरिएको छ ।
बजेटले ज्येष्ठ नागरिकको हितलाई समेत ध्यानमा राखेर काम गर्ने योजना बनाएको छ । वडागत खेलकुद, विद्यालय सुधार तथा शिक्षक प्रोत्साहन, उत्कृष्ट विद्यालय तथा शिक्षकलाई प्रोत्साहन गर्नेलगायतका कार्यक्रमले पनि प्राथमिकता पाएको छ । पर्यटन क्षेत्रका लागि छरछरे झरना, घण्टाचुली डाँडोलगायतका क्षेत्रलाई पनि प्राथमिकतामा राखेर काम गर्ने योजना अघि सारिएको गाउँपालिकाका उपाध्यक्ष भुवनसिंह गुरूङले जानकारी दिए ।
विगतको अधुरा काम पनि पूरा गर्ने गरी नयाँ बजेट प्रस्तुत गरिएको उनले बताए । एक–दुई दिनमा उक्त बजेटमाथि छलफल हुने उपाध्यक्ष गुरूङले जानकारी दिए । साथै, शुक्रबार नै गाउँपालिकाको गाउँसभाबाट विभिन्न विधेयकसमेत पारित भएको छ ।
