स्नेहा कर्ण, काठमाडौँ । बङ्गलादेशमा २ महिनामै १ सय १७ प्रतिशतले महँगी बढेपछि अध्ययनको शिलशिलामा बङ्गलादेश पुगेका नेपाली विद्यार्थीहरू समस्यामा परेका छन् । बङ्गलादेशमा इन्धन, खाद्यान्नलगायत सामग्रीको मूल्य हालसम्मकै उच्च बिन्दुमा पुगेको छ ।

चिकित्सा शिक्षा अध्ययनका लागि त्यहाँ पुग्नुभएका धनुषाका सत्यम महाशेठले महँगीले पठनपाठनका लागि आउनजानै समस्या भएको बताउनुभयो ।  

मँहगीका कारण बङ्गलादेशको ढाका, रङ्गपुर, राजशाही, लगायतका स्थानमा रहेका झन्डै ३ हजार नेपाली समस्यामा छन् । विशेषगरी चिकित्सा शिक्षा, इन्जिनियरिङ, कृषि, पशु विज्ञान लगायत विषयमा अध्ययन गर्न पुगेका नेपाली विद्यार्थीलाई बढ्दो महँगीले कसरी जीवन चलाउने भन्ने चिन्ता हुन थालेको छ ।

बङ्गलादेशमा पेट्रोल प्रतिलिटर १ सय ३५ टाका, डिजल र मट्टितेल १ सय १४ टाकामा बिक्रि भइरहेको छ भने चामल प्रतिकिलो ८२ टाका पुगेको छ । मासु, अन्डा, तेल, विजुली, ग्यास लगायतका सामग्रीको मूल्य पनि १० देखि ३० प्रतिशतसम्म वृद्धि भएको छ । महँगीका कारण नेपाली विद्यार्थीलाई कलेज आउन जान, खान, अध्ययनका लागि चाहिने सामग्री खरिद गर्न मुस्किल हुन थालेको छ ।

बङ्गलादेशस्थित नेपाली राजदूतावास कार्यालयका सचिव रञ्जन यादवले मँहगी बढेको भए पनि विद्यार्थीहरूले आधिकारीक जानकारी नगराएको बताउनुभयो ।

दक्षिण एशियाली मुलुकमध्ये बङ्गलादेशको अर्थ व्यवस्था सबैभन्दा तीव्र गतिमा अघि बढ्दै थियो । तर, कोरोना महामारी, इन्धनको बढ्दो खपत, बाढीका कारण खेतीयोग्य जमिनमा क्षति, निर्यातको दरमा कमीका कारण बङ्गलादेशको अर्थतन्त्र खस्किदै गएको छ । यसैका कारण भएको मँहगी र अभावमा नेपाली विद्यार्थी पनि परेका छन् ।