नेविसंघले रुम टु रिडको ताला खोल्यो, अजिरकोट गाउँपालिकाविरुद्ध आन्दोलन गर्ने

इच्छाकामना न्युज

२६, मंसिर २०८१

नेविसंघले रुम टु रिडको ताला खोल्यो, अजिरकोट गाउँपालिकाविरुद्ध आन्दोलन गर्ने

गोरखा। नेपाल विद्यार्थी संघले रुम टु रिड नामक गैरसरकारी संस्थाको कार्यालयमा लगाएको ताला खोलेको छ । अजिरकोट गाउँपालिकाद्वारा प्रकाशित अजिरकोट सेरोफेरो नामक पुस्तकमा सो संस्थाले आफ्नो संस्थाको कुनै भूमिका नरहेको स्पष्ट पार्दै सोमबार विज्ञप्ति जारी गरेपछि नेविसंघले कार्यालयमा लगाएको ताला खोलेको हो ।

नेविसंघले सोमबार एक विज्ञप्ति जारी गरी रुम टु रिडको कार्यालयमा लगाएको ताला खोलेको जनाएको छ । साथै सोही विज्ञप्तिमार्फत नेविसंघले अजिरकोट गाउँपालिकाविरुद्ध भने विरोधको कार्यक्रम गर्ने जनाएको छ ।

‘अजिरकोट गाउँपालिकाले आज प्रकाशित विज्ञप्तिमा शिक्षा समिति तथा पाठ्यपुस्तक प्रकाशन कार्यदलसंग बैठक नै नबसी बैठक बसेर साझा सहमति गरिसकेको भनेर मिथ्या प्रचारप्रति हाम्रो गम्भीर ध्यानाकर्षण भएको छ’, विज्ञप्तिमा भनिएको छ, ‘नेपालको संविधानले निर्दिष्ट गरेको सशस्त्र द्वन्द्वलाई जनयुद्धको नाम दिई जनयुद्धको दिशामा अघि बढौँ भन्ने नाराहरु समेटी एउटा दलको झण्डा छापेर उक्त पुस्तक कदापि स्वीकार्य हुन सक्दैन ।’

आफ्नो भद्र अनुरोधलाई बेवास्ता गरी झुठ प्रचार गरेकोप्रति आपत्ति जनाउँदै नेविसंघले पालिकाविरुद्ध मंगलबारदेखि विरोधको कार्यक्रम गर्ने जनाएको छ ।