सिम्जुङ–घ्याच्चोक सडक कालोपत्रेको कामले तिव्रता पाउँदै

इच्छाकामना न्युज

९, पौष २०८१

सिम्जुङ–घ्याच्चोक सडक कालोपत्रेको कामले तिव्रता पाउँदै

गोरखा । अजिरकोट गाउँपालिका वडा नं ४ सिम्जुङ र वडा नं. १ घ्याच्चोक जोड्ने सडक कालोपत्रेको काम तिव्र गतिमा अघि बढेको छ ।

हालसम्म ५० प्रतिशत काम सम्पन्न भइसकेको पूर्वाधार बिकास कार्यालयले जनाएको छ । ‘ग्याविन जाली भर्ने, पर्खाल र नाला निर्माण लगायतका संरचनाहरुको काम लगभग सम्पन्न भईसके,’ कार्यालयका इन्जिनियर दिपक बस्न्यातले भने, ‘अहिले पेभमेन्टको काम सुरु भएको छ ।’ कुल ७.३ किलोमिटरको उक्त खण्डमध्ये ५.७ किलोमिटर कालोपत्रे र बाँकी १.६ किमी ढलान हुने उनले जानकारी दिए ।

‘असफाल्ट प्रविधिको कालोपत्रे हुने हो, यो अहिले नेपालमा चलेको कालोपत्रेका प्रकारमध्येको उत्कृष्टमा पर्छ,’ बस्न्यातले भने । सडक कालोपत्रेको जिम्मा कर्ण/नवकान्तिपुर जेभीले पाएको छ । २०८० साल असार २० गते ठेक्का सम्झौता भएको हो । २०८२ साल असार १९ गतेभित्र काम सक्ने गरी सम्झौता भएको छ । अहिलेको कामको प्रगति अनुसार निर्धारित समयमै काम सम्पन्न हुने कार्यालयले जनाएको छ ।

संघ तथा प्रदेश सरकारको ५०/५० प्रतिशत लागत सहभागीतामा सडक कालोपत्रे हुन लागेको हो । समपुरक बजेट अन्तरगत कुल ३६ करोड ४७ लाख लागतमा सडक कालोपत्रे हुन लागेको कार्यालयले जनाएको छ ।

‘सडक चौडा गर्ने, आवश्यक ठाउँमा रिटर्निङ वाल लगाउने, र सडकसँगै नाला निर्माण पनि गर्ने हो,’ इन्जिनियर बस्न्यातले भने । सडक कालोपत्रे भएसँगै महभिर, घ्याच्चोक, सिम्जुङ लगायतका स्थानीयलाई आउजाउमा निकै सहज हुने बताइएको छ । कालोपत्रे भएसँगै सडकको धुलो र धुवाबाट पनि मुक्ति पाउने भन्दै स्थानीय खुशी देखिन्छन् ।