गोरखा । उत्तरी गोरखाको स्यालामा गुरु पद्मसम्भवको गुम्बा निर्माण गरिएको छ । विश्वको आठौं अग्लो मनास्लु हिमाललाई पृष्ठभूमिमा पारेर खेम्पो सोनाम दोर्जे रिम्पोछेले करोडौँ लागतमा आकर्षक गुम्बा निर्माण गरेका हुन् ।

चुमनुब्री गाउँपालिका २ स्यालाको सयौँबर्ष पुरानो गुम्बा भएको ठाउँमा साङ्दोक पार्ली गुम्बा निर्माण गरिएको सो वडाका पूर्व वडाअध्यक्ष पेम्बारेता लामाले बताए । गुम्बा धार्मिक र पर्यटकीय दृष्टिले निकै महत्वपूर्ण रहेको उनले बताए । स्यालामा माध्यमिक विद्यालय निर्माण गरेका खेम्पो सोनाम दोर्जे रिम्पोछेले सो ठाउँमा गुरु पद्मसम्भवको गुम्बा पनि निर्माण गरेका उनले बताए ।

‘खेम्पो सोनाम दोर्जे रिम्पोछेले हिउँदमा आर्खेत र बर्खामा स्यालामा सञ्चालन हुने ल्हो मावि निर्माण गर्नुभएको थियो । त्यही स्कूलको एकसय मिटर आसपासमा गुरु पद्मसम्भवको गुम्बा बनाउनु भएको छ’, लामाले भने, ‘फिनिसिङका सानातिना कामबाहेक निर्माण गरेर करिब करिब सम्पन्न भएको छ । अब उद्घाटन गर्न बाँकी छ ।’ पृष्ठभूमिमा ८,१६३ मिटर अग्लो मनास्लु हिमाल देखिने गरी यो गुम्बा आकर्षक तिब्बती शैलीमा बनेको छ । ‘स्याला भनेको किमोलुङ(धार्मिक तीर्थ) अन्तर्गत पर्ने क्षेत्र हो । यहाँ धेरै पुरानो बस्ती थियो’, लामा भन्छन्, ‘स्यालाको वरिपरि करिब पाँचसय मिटर वरपर राङदिन गुम्बा, स्याला गुम्बा, होङसाङपु गुम्बा र फोर्साङवाल गुम्बा थिए ।

अरु दुईवटा गुम्बाहरु भग्नावशेषका रुपमा बाँकी छन् । स्याला गुम्बा र होङ्साङपु गुम्बा भने पुनर्निर्माण भएका छन् ।’ अत्यन्त आकर्षक शैलीमा निर्माण गरिएकाले यो गुम्बाले पर्यटन विकासमा ठूलो टेवा पुग्ने विश्वास उनको छ । ‘यो गुम्बाको आकर्षणले यस क्षेत्रमा मात्र होइन, उचित प्रचारप्रसार हुन सकेमा नेपालमै पर्यटक बढ्न सक्छ’, उनले भने, ‘स्याला गाउँ, स्याला गुम्बा र सिधै मनास्लु हिमाल देखिने हुनाले मनास्लु आउने स्वदेशी, विदेशी पर्यटक यहाँ फोटो खिचाएर मात्र जान्छन् ।’ धेरैजसो ङिङ्मापा सम्प्रदायले मान्ने यो गुम्बा पूजाआजाका लागि निर्माण गरिएको हो ।

ध्यानका लागि अर्को गुम्बा निर्माण हुने पूर्ववडाअध्यक्ष लामाको भनाइ छ । ‘ध्यानका लागि र आवासका लागि अर्को भवनहरु पनि बन्नेछन्’, उनले भने । चुमनुब्री गाउँपालिकाको वडा नं. ३ बाहेक बाँकी कुनै पनि वडामा सडक सञ्जालले छोएको छैन । खेम्पो सोनाम दोर्जे रिम्पोछेले हेलिकोप्टरबाट एक्साभेटर ढुवानी गरेर यहाँ गुम्बाका लागि मैदान निर्माण गरेका थिए ।साथै गुम्बासंगै विद्यार्थीहरुका लागि ठूलो खेलमैदान पनि निर्माण गरिएको छ ।