गोरखा । गोरखाको चुमनुब्री गाउँपालिका–३ सल्लेरीका बासिन्दाले ‘बूढीगण्डकी डुबान पीडित सरोकार समिति’ गठन गरेका छन् । निर्माण हुन लागेको ३४१ मेगावाटको बूढीगण्डकी जलविद्युत आयोजनाबाट प्रभावित हुने सल्लेरीका ३१ घरधुरीका बासिन्दाहरुको मंगलबार सम्पन्न भेलाले समिति गठन गरेको हो ।

भेलाले स्थानीय जीवन गुरुङको संयोजकत्वमा ९ सदस्यीय ‘डुबान पीडित सरोकार समिति’ गठन गरेको भेलामा सहभागी भएका वीरबल घलेले जानकारी दिए । विस्थापित हुने परिवारहरुकोे घरजग्गाको मुआब्जाको टुङ्गो लगाउनेगरी समिति गठन गरिएको घलेले बताए ।

‘समितिले आयोजनासँग आफ्नो घरजग्गाको मुआब्जा टुङ्गो लगाउने काम गर्नेछ’, उनले भने, ‘आयोजना निर्माण गर्दा स्थानीयलाई रोजगारीको प्राथमिकतामा राख्ने र डुवान पीडितहरुलाई निशुल्क सेयरको व्यवस्था मिलाउनुपर्ने माग गर्ने निर्णय समितिले गरेको छ ।’ घर मात्र भएकाहरुलाई पुनर्बासको व्यवस्था मिलाउनुपर्ने मागसहित समिति गठन गरिएको उनले जानकारी दिएका छन् ।
आयोजनाले सल्लेरीको सामुदायिक संरचना ध्वस्त गर्ने भन्दै त्यहाँका स्थानीयहरुले एकिकृत बस्ती निर्माण गरिदिन समेत माग गरेका छन् ।

साहास उर्जा नामक प्राइभेट कम्पनीले धार्चे र चुमनुब्री गाउँपालिकाको साँध सल्लेरी–तातोपानी खण्डमा उक्त जलविद्युत आयोजना निर्माण गर्न लागेको हो । सो आयोजना ‘पिकिङ रन अफ दि रिभर’ प्रकृतिको आयोजना हो । यसको मुख्य संरचना बूढीगण्डकी नदीको दायाँ किनारमा रहनेगरी डिजाइन तयार पारिएको कम्पनीले जनाएको छ । आयोजनाको दैनिक ५ घण्टाको दरले पिकिङ हुने गरी पोखरी निर्माण गरिनेछ ।

यसको डिजाइन बहाव १००.२७ घनमिटर प्रतिसेकेण्ड र कुल हेड ३९८ मिटर रहने अध्ययनले देखाएको छ । बूढीगण्डकी नदीमा बाँध बाँधी खोलाको दायाँपट्टि निर्माण हुने इन्टेकबाट पानीलाई फर्काउन आयोजनाको मुख्य संरचना सेटलिङ बेसिन, हेडरेस टनेल, सर्ज साफ्ट, पेनस्टक पाइप हुदै विद्युत गृहमा पु¥याउने गरी डिजाइन तयार भएको छ । भूमिगत विद्युत गृहमा ५७ मेगावाटका ६ वटा भर्टिकल एक्सिस पेल्टोक टर्बाइनमार्फत विद्युत उत्पादन हुनेछ ।

आयोजनको सबै काम योजनावद्ध रुपमा अघि बढे २०८५ चैतदेखि व्यवसायिक उत्पादन गर्ने कम्पनीको लक्ष्य छ । उत्पादित उर्जालाई करिब ४५ किलोमिटर लामो प्रशारण लाइन निर्माण गरी नुवाँकोटको रातामाटे सवस्टेशनमा जोडिनेछ । यसअघि सो आयोजना टाइम्स इनर्जी प्रालिले निर्माणको लाइसेन्स प्राप्त गरी काम अघि बढाइरहेको थियो । सो प्रालिलाई सहास उर्जाले प्राप्ति गरी निर्माणका लागि आन्तरिक गृहकार्यको गरिरहेको छ ।