गोरखा । दरौँदी बृहत लिफ्टिङ खोनपानी आयोजना गोरखा नगरपालिकाको खानेपानी तथा सरसफाई व्यवस्थापन बोर्डलाई हस्तान्तरण गरिएको छ । संघिय खानेपानी आयोजनाले मंगलवार बोर्डलाई हस्तान्तरण गरेको हो । आयोजनाका प्रमुख नरेश रेग्मी र गोरखा नगरपालिकाका मेयर एवं बोर्डका अध्यक्ष कृष्ण रानाले हस्तान्तरण पत्रमा हस्ताक्षर गरेका छन् । अव दरौँदी लिफ्टिङ खानेपानी आयोजनाको व्यवस्थापनको सम्पूर्ण पाटो नगरपालिकाको बोर्डले हेर्ने छ ।

‘हामी अव संचालन संयन्त्र तयार गर्छाै,’ मेयर रानाले भने, ‘त्यसले आयोजना संचालन गर्छ ।’ कार्यकारी अधिकृतको संयोजकत्वमा संयन्त्र बन्ने बताउँदै उनले छिट्टै बिज्ञापन खुलाएर कार्यकारी अधिकृत नियुक्त गरिने जानकारी गराए । संयन्त्र नबन्दासम्म संघिय खानेपानी आयोजना र दरौँदी लिफ्टिङ खानेपानी तथा सरसफाई उपभोक्ता संस्थालाई आयोजनाको संचालन गर्न भनिएको उनको भनाइ छ ।

‘संयन्त्र नबन्दासम्म उहाँहरुलाई नै हेर्न भनेका छौ, अव छिट्टै संयन्त्र बनाएर बोर्डको कार्यालय खडा गरेर त्यहीबाट आयोजना संचालन गर्छाै,’ उनले भने । उपभोक्तालाई सुलभ मूल्यमा पानी उपभोग गराउनका लागि महशुल निर्धारणको तयारी समेत बोर्डले गरिरहेको बताइएको छ । हालको भन्दा केही महशुल कम हुने बोर्डले जनाएको छ ।

आवश्यकता अनुसार नगरभित्रका खानेपानी आयोजनालाई बोर्डले लिएर संचालन गर्ने बताइएको छ । बोर्डले अपनत्व लिने नगरभित्रका खानेपानी आयोजनाहरु अव बोर्डले निर्माण गर्ने संयन्त्र मार्फत संचालन हुने छन् । यसअघि नगरसभाबाट खानेपानी ऐन पास भइसकेको छ । सोही ऐन अनुसार संयन्त्रले खानेपानी आयोजनाहरु संचालन गर्ने छ । अव नगरभित्रको खानेपानीका समस्या हल हुने बोर्डका अध्यक्ष एवं नगर प्रमुख रानाले अपेक्षा गरेका छन् ।