गोरखा । प्रजातन्त्र दिवसको दिन (फागनु ७ बुधबार) सार्वजनिक बिदा भएपनि जिल्ला प्रशासन कार्यालयको सेवा संचालन हुने भएको छ । मंगलवार सार्वजनिक सूचना जारी गर्दै कार्यालयले राहदानी, राष्ट्रिय परिचयपत्र र नागरिकता सम्बन्धी सेवा प्रवाह हुने जानकारी गराएको हो । गृह मन्त्रालयद्धारा नेपाल राजपत्रको भाग ५ मा प्रकाशित सूचनामा सार्वजनिक सेवा प्रवाह सम्बन्धी भएको बिशेष व्यवस्था बमोजिम सेवा प्रवाह गर्न लागिएको बताइएको छ ।

उक्त व्यवस्था अनुसार यसअघि पनि कार्यालयले रामनवमी, गणतन्त्र दिवस, रक्षावन्धन, कृष्ण जन्माष्टमी, घटस्थापना, शहिद दिवस लगायतका सार्वजनिक बिदाका दिन पनि उक्त सेवा प्रवाह गरेको थियो । यही फागुन १४ गते परेको महाशिवरात्री र १६ गतेको ग्याल्पो ल्होसारको दिन सार्वजनिक बिदा भएपनि कार्यालयको सेवा संचालन हुने बताइएको छ ।