त्रिशूली नदीमा जाँडको झोल मिसाइएको खुलासा, वातावरण मन्त्रालयको टोलीद्वारा अनुगमन

इच्छाकामना न्युज

८, जेठ २०८२

त्रिशूली नदीमा जाँडको झोल मिसाइएको खुलासा, वातावरण मन्त्रालयको टोलीद्वारा अनुगमन

इच्छाकामना, २०८२ जेठ ७ – चितवनको इच्छाकामना गाउँपालिका–४, कुरिनटारमा अवस्थित बाह्रसिङ्गै बियर फ्र्याक्ट्रीले उत्पादनपछि बाँकी रहेको अप्रशोधित र दुर्गन्धित जाँडको झोललाई अन्डरग्राउन्ड ह्युमपाइपमार्फत सिधै त्रिशूली नदीमा मिसाएको पत्ता लागेको छ।

उक्त क्रियाकलापले त्रिशूली नदीको स्वच्छता र पवित्रतामा प्रत्यक्ष असर पार्दै आएको भन्दै स्थानीय ५० भन्दा बढी नागरिकले हस्ताक्षरसहितको उजुरी पेश गरेका थिए।

उनीहरूले यस विषयमा लामो समयदेखि गुनासो गर्दै आए पनि स्थानीय निकायबाट कुनै प्रभावकारी कारबाही नभएको आरोप लगाएका छन्।

स्थानीयको निवेदन पश्चात बागमती प्रदेशको वन तथा वातावरण मन्त्रालय, हेटौंडा मा उजुरी पुगेपछि मन्त्री कृष्णप्रसाद सिलवालको निर्देशनमा तत्काल अनुगमन टोली पठाइएको हो।

अनुगमन टोलीले घटनास्थलमा पुगेर वस्तुस्थितिको अध्ययन गरिरहेको छ। मन्त्री सिलवालले नदीको प्रदूषण नियन्त्रणमा कुनै कसर बाँकी नराख्ने प्रतिबद्धता जनाउँदै दोषीमाथि आवश्यक कारबाही गरिने स्पष्ट पारेका छन्।

स्थानीयवासीले यस्तो प्रदूषणले माछापालन, सिँचाइ, धार्मिक आस्था र जनस्वास्थ्यमा गम्भीर असर पारिरहेको भन्दै स्थायी समाधानको माग गरेका छन्।