.png)
कर्नाटकका पूर्वमुख्यमन्त्री तथा भारतीय जनता पार्टी (भाजपा) का सांसद बसवराज बोम्मईले पत्रकारहरूसँग कुरा गर्दै राज्य सरकारको लापरबाहीका कारण त्यस्तो दुर्घटना भएको आरोप लगाएको हुन्। उनले उक्त घटना अनुसन्धान गर्न माग पनि गरेका छन्।
उनले भने, ‘यो एकदमै दुर्भाग्यपूर्ण घटना हो। गैरजिम्मेवार सरकारका कारण ११ जनाको मृत्यु भएको छ भने ६० भन्दा बढी घाइते भएका छन्।"
कर्नाटकको वर्तमान सरकारलाई 'अहंकारी' भएको आरोप लगाउँदै सांसद बोम्मईले थपे, ‘उनीहरूमा मानवता छैन। हामी माग गर्छौं- यो घटनाको उच्च अदालतको बहालवाला न्यायाधीशद्वारा अनुसन्धान गरियोस्, जसमा यो घटनाको योजना बनाउने र अनुमति दिनेहरूलाई सोधपुछ गरिनुपर्छ।’
उता कर्नाटकका उपमुख्यमन्त्री डीके शिवकुमारले भने भाजपाले दुर्घटनामा राजनीति गरिरहेको आरोप लगाएका छन्।
उपमुख्यमन्त्रीले अगाडि भने, ‘हामी यस घटनाका लागि माफी चाहन्छौँ, तर हामी अझै पनि तथ्य जान्न चाहन्छौँ।’
रोयल च्यालेन्जर्स बेंगलुरु (आरसीबी) ले पहिलोपटक इन्डियन प्रिमियर लिग (आईपीएल) को उपाधि जितेको उपलक्ष्यमा बुधबार विजयोत्सव मनाउने क्रममा भागदौड हुँदा कम्तीमा ११ जनाको मृत्यु भएको हो।
कर्नाटक राज्यका मुख्यमन्त्री सिद्धरामय्याले मृतकका परिवारलाई जनही १० लाख रुपैयाँ क्षतिपूर्ति दिन घोषणा गरेका छन् भने घाइतेहरूको उपचार नि:शुल्क गरिदिने बताएका छन्।
भारतका प्रधानमन्त्री नरेन्द्र मोदीले दुर्घटनाप्रति गहिरो शोक व्यक्त गरेका छन्।
