भरतपुर । शान्ति सुरक्षा, अपराध अनुसन्धानजस्ता काममा व्यस्त हुने प्रहरी अहिले फुर्सदको समय निकालेर घुम्न थालेका छन् । ‘घुमौँ चितवन’ भन्ने नारा नै दिएर जिल्ला प्रहरी कार्यालय चितवनले आफ्ना कर्मचारीहरुबीच नयाँ अभ्यासको थालनी गरेको हो ।

सबै प्रहरी कर्मचारीमा मानसिक तथा शारीरिकरुपमै स्फूर्ति ल्याउनका लागि आफूले योजना बनाएअनुसार घुमौँ चितवन अभियान थालिएको चितवन प्रहरी प्रमुख एसपी गोविन्द पुरीको भनाइ छ । ‘दिनरात नभनी काममा खटिने प्रहरी कर्मचारीको पनि घुम्ने, रम्ने रहर हुन्छ । व्यस्त समयबाट फुर्सद निकालेर समूह–समूह बनाई जिल्लाका विभिन्न पर्यटकीय स्थानहरु घुमाउने योजना रहेको छ’, एसपी पुरीले भने ।

जिल्लाको कुनै बिट, कार्यालय, चौकीमा खटिएको प्रहरी त्यहीँवरपरका बारेमा मात्र जानेर अन्य जिल्लामा सरूवा भई जाने गरेका छन् । अब आफू कार्यरत जिल्लाकै कुन ठाउँमा के छ, भौगोलिक, धार्मिक, ऐतिहासिक, प्राकृतिक रमणीय ठाउँहरु थुप्रै भए पनि जान्ने, बुझ्ने, घुम्ने मौका पाएका हुन्नन् । त्यसैले, जिल्लाको अवस्था जान्न, बुझ्नका लागि पनि यो अभियान थालिएको एसपी पुरीको भनाइ छ ।

एकोहोरो काममा मात्र व्यस्त हुँदा कामको नतिजा पनि भनेजस्तो नआउन सक्छ, खालि तनावको वातावरणमा काम गर्नुपर्ने परिवेशबाट छुटकारा दिलाई जागिरे जीवनमा पनि मनोरञ्जन र नयाँ अनुभूतिका लागि नयाँ काम थालिएको उनको भनाइ छ । ‘यसो हेर्दा प्रहरी घुमेजस्तो देखिएला तर घुमेका ठाउँको प्रचारप्रसार पनि सँगसँगै भइरहेको हुन्छ । जसले त्यस ठाउँको थप प्रवद्र्धनका लागि सहयोग गर्छ’, एसपी पुरीले भने ।

घुम्ने ठाउँसम्म पुग्नका लागि यातायात व्यवस्थापन, स्वागतसत्कार, अन्तक्र्रियाजस्ता गतिविधिका हकमा सरोकारवालासँग सहकार्य भएको प्रहरीको भनाइ छ । ‘एक जना प्रहरी कर्मचारीले घुमेको ठाउँमा फोटो/भिडियोमात्रै हालेमा पनि त्यसको व्यापकता धेरै रहन्छ, त्यही फोटो/भिडियो हेरेर त्यो ठाउँ घुम्न आउने पनि हुन्छन् ।

उनीहरुकै परिवार आउँदा पनि घुम्न जाने वातावरण बन्छ’, एसपी पुरीले भने । हप्ताको एकदिन बिदाको समय पारेर कामको चाप कम भएको बेला मनोरञ्जन लिने उद्देश्यले गरिएको अभियान सकारात्मक ऊर्जाका लागि प्रभावकारी भएको चितवन प्रहरी नायब उपरीक्षक रवीन्द्र खनालले बताए ।

‘जिल्लाका हरेक प्रहरी कार्यालयका कर्मचारी आफू कार्यरत स्थानमा कामविशेषले पनि घुमेकै हुन्छन्, तर अन्य ठाउँमा घुम्ने, रम्ने अवस्था रहन्न । त्यसैले, एक ठाउँको कर्मचारीलाई अर्को ठाउँमा घुम्न पठाउने गरिएको छ’, डिएसपी खनालले भने, ‘मनकामना मन्दिर दर्शन, नारायणीमा डुङ्गा सयर गरिसकेका छौँ, अब जिल्लाका अन्य पर्यटकीयस्थलहरु पनि घुम्ने र घुमाउने योजना बनेको छ ।’ घुम्ने अभियानले प्रहरी कर्मचारीमा कामप्रतिको लगाव झनै बढेर जाने प्रहरीको भनाइ छ ।