कास्की । तमू सञ्चारकर्मी संघ नेपालै तमू क्युईर् फेंतें बिबै तों लबै त्हीन म्हादिइमो। भदोई १ गते तमू धीं नेपालै रोधीँ हल पखोरार् ३१औँ त्हीन् म्हादिब हो। तमू ( गुरुङ ) सञ्चारकर्मी संघ नेपालै क्रथेबा लाला तमूई अध्यक्षतर् तबै तुरुर् तमूमै सामाजिक प्रतिष्ठानै ल्हागिर गोरखापत्रै पृष्टभूमी संयोजकै के लदिबा, म्हिथेब्स्यो अनिता तमूस्योलाई सम्मान ललो। तमू धीँ नेपालै क्रथेबा हुम तमूई तमू सञ्चारकर्मी संघै स्योताँई बारेर ताँ थिँलो।

गोरखापत्रर् तमू क्युइर् फेंतें प्ह्रीब, न्होयाँबा सपारिबै के लब बिसिर अनिता तमूस्योदे म्हादिब तमू सञ्चारकर्मी संघ नेपालर्बे क्रथेब लाला तमूई बिई। रेडियो नेपालर्बे प्रदेशिक प्रसारण केन्द्र गण्डकी प्रदेशर्बे क्रथेब्स्यो शान्ति तमूस्यो नि तमू प्ये ल्हु संघ केन्द्रर्बे क्रथेबा ओम तमूई अशिमलँ बिउँदेन् सैंर्बे ताँ थेंलो। तुरुर्बे प्र्हें थेवा,गण्डकी प्रदेशै न्हुरै के लब नि केइ चाँजो लब मन्त्री डा टकराज तमूई तमू समाज विचित्रबै मुबा ताँ थिँई। क्युखाधुर् अथवा धरुर क्युखामनि, क्यु तो नि, थेबै जात भिउमै बिबै त्हीर क्यु तोल तुबा वा खाल तुब त्हीए मोल। तोखोबे संविधानै छाबै सीइ झोकोलै स्योमिसुम्।

ङ्यो तान घ्रिन भिवै ताँ बिई, ओंसोकोतो ख्यमै मात्र भिउधुँले के लदिउमैलै चु सिइ छ्याँउ आम्हादिसुम्। छतैर दे स्यो ताँ लदिबै मो। चु ताँ ङई भन्दए ल्हें बेउरीबा वा म्रोब, ङ भन्दा ओंसोबे म्हिथेउमै चुन्न मो भिबै ताँ थेंल। तुरुर तमू (गुरुङ) सञ्चारकर्मी संघ कास्कीर्बे क्रथेबा युग तमूई ताँन्लैन छ्यात्यैबा ललो। तमू (गुरुङ) सञ्चारकर्मी संघ नेपालर्बे क्रथेबा लाला तमूई ग्यासजे भिउनेन तुरुलै खाँल्लै भिसा तमू (गुरुङ) सञ्चारकर्मी नेपालर्बे च्योंबै क्रथेब्स्यो खीमा तमूस्योई ओलेल।