नेपाल तमू विद्यार्थी छोँज धीँको केन्द्रीय पार्सद सभा चितवनमा हुदैँ

इच्छाकामना न्युज

२४, पौष २०८२

नेपाल तमू विद्यार्थी छोँज धीँको केन्द्रीय पार्सद सभा चितवनमा हुदैँ

भरतपुर ।

नेपाल तमू (गुरूङ) विद्यार्थी छोँज धीँ केन्द्रीय पार्सद सभा चितवनमा हुने भएको छ । बिहीबार भरतपुरमा पत्रकार सम्मेलन गरेर पार्सद सभाबारे जानकारी गराएको हो । छोँज धीँका केन्द्रीय अध्यक्ष पवन गुरूङका अनुसार देशभरका करिब २७ जिल्लाबाट १५० जना प्रतिनिधि एवम् पर्यवेक्षक चितवनमा आउने छन् ।

यही पुस २६ र २७ गते हुने सभाको लागि स्थानीय व्यवस्थापनमा चितवन जिल्ला शाखाले संयोजन गर्नेछ । अध्यक्ष गुरूङका अनुसार सभामा वार्षिक कार्यसमीक्षा तथा भावी कार्ययोजनाबारे छलफल हुनेछ । त्यसबाहेक, विभिन्न विषयमा विज्ञता प्राप्त गरेका व्यक्तिलाई मुख्य वक्ताको रुपमा समेत उपस्थिति गराउने तयारी भएको उनले बताए ।

सभामा समसायिक राजनैतिक परिस्थिति, जेन जी विद्रोह र साङ्गानिक विधि र पद्धतिसम्बन्धी तमू ह्युल छोँज धीँ गुरूङ राष्ट्रिय परिषदका केन्द्रीय उपाध्यक्ष दिल गुरूङ, तमू जातिको भाषा, धर्म, संस्कार र संस्कृतिबारे तमू विद्यार्थी छोँज धीँका संस्थापक अध्यक्ष एवम् खेमा लिपिका अभियन्ता भीमबहादुर गुरूङ र सूचना प्रविधि र संस्कृति सम्वद्र्धन तथा सङ्गठनात्मक विकासमा यसको प्रयोग विषयमा तमू विद्यार्थी छोँज धीँका शैक्षिक विभाग प्रमुख बुधराम गुरूङले प्रशिक्षण दिनेछन् ।

दुई दिने कार्यक्रमको लागि करिब तीन लाख रुपैयाँ खर्च हुने अनुमान गरिएको छ । सदस्यता शुल्कसहित विभिन्न दाताहरुको सहयोगमा खर्च व्यवस्थापन गर्ने तयारी भइरहेको ह्युल छोँज धीँका अध्यक्ष गुरूङले बताए ।