प्रतिनिधिसभाको बैठकमा आजपनि बजेटको प्राथमिकता बारेमा छलफल हुने

इच्छाकामना न्युज

५, जेठ २०७९

प्रतिनिधिसभाको बैठकमा आजपनि बजेटको प्राथमिकता बारेमा छलफल हुने

काठमाण्डौ, ५ जेठ । प्रतिनिधिसभाको बैठकमा आजपनि आगामी आर्थिक वर्षको बजेटको प्राथमिकता बारेमा छलफल हुने कार्यसूची छ । दिउँसो १ बजेका लागि बोलाइएको बैठकमा बजेटको प्राथमिकता बारेमा छलफल हुने संसद् सचिवालयले जनाएको छ । संसद्मा हिजोदेखि यो विषयमा छलफल सुरु भएको हो ।

आगामी आर्थिक वर्ष २०७९÷८० का लागि विनियोजन विधेयकको सिद्धान्त र प्राथमिकता सम्बन्धमा भएको छलफलमा सांसदहरूले दबाबमा रहेको अर्थतन्त्र उकास्नेगरि बजेट ल्याउनुपर्ने धारणा राखेका छन् । बैठकमा धारणा राख्दै नेकपा एकिकृत समाजवादीका नेता झलनाथ खनालले नागरिकको जनजीविकालाइ सहजता पुग्ने गरि बजेट ल्याउनुपर्ने माग गर्नुभयो ।

यस्तै जनता समाजवादी पार्टीका सङ्घीय परिषद् अध्यक्ष तथा पूर्वप्रधानमन्त्री डा. बाबुराम भट्टराईले भारतसँगको असमान व्यापार सम्बन्ध सच्याउनुपर्ने आवश्यकता भएको बताउनुभएको छ । एमालेका नेता योगेश भट्राइले नागरिकको प्राथमिकता निर्धारण गरेर बजेट ल्याउन सुझाव दिनुभयो ।

नेपाली काँग्रेसका सांसद डा. डिला सङ्ग्रौलाले आमजनतालाई सकारात्मक प्रभाव पार्ने र निम्न वर्गका तह र तप्कालाई माथि उकास्ने खालको बजेट निर्माण हुनुपर्ने बताउनुभयो । यसैबीच राष्ट्रिय सभाको बैठक पनि आजै दिउँसो १ बजेका लागि बोलाइएको छ ।