काठमाण्डौ, २३ असार । सङ्घीय संसद्को दुवै सदनको बैठक आज बस्दैछ । राष्ट्रिय सभाको बैठक बिहान ११ बजे र प्रतिनिधि सभाको बैठक दिउँसो २ बजेका लागि बोलाइएको सङ्घीय संसद् सचिवालयले जनाएको छ ।
सचिवालयका अनुसार राष्ट्रिय सभाको बैठकमा राष्ट्रपतिको कार्यालयबाट प्राप्त मन्त्रीपरिषद् गठनसम्बन्धी पत्र अध्यक्षले पढेर सुनाउने कार्यसूची छ ।
राष्ट्रिय सभाका सचिव राजेन्द्र फुयाँलले प्रतिनिधि सभाबाट सन्देशसहित प्राप्त मदन भण्डारी विज्ञान तथा प्रविधि विश्वविद्यालय विधेयक २०७६ सभामा टेबुल गर्ने कार्यसूची छ ।
प्रतिनिधि सभाको आजको बैठकमा गृह मन्त्री बालकृष्ण खाँणले नेपाल नागरिकता (पहिलो संशोधन) विधेयक, २०७५ फिर्ता लिनको लागि प्रस्तुत गर्ने कार्यसूची रहेको सचिवालयले जनाएको छ ।
सामाजिक सुरक्षा (पहिलो संशोधन) विधेयक, २०७९ सम्बन्धी समितिको प्रतिवेदन र विधेयकक दफाहरु निर्णयार्थ प्रस्तुत हुनेछ भने अरु केही विधेयक पारित गर्ने तयारी सचिवालयले गरेको छ ।