गोरखा । गोरखामा अब दुईवटा ‘ख श्रेणी’का एम्बुलेन्स चल्ने भएका छन् । नेपाल रेडक्रस सोसाइटीले मंगलबार रेडक्रसको गोरखा शाखालाई ‘ख’ बर्गको एम्बुलेन्स प्रदान गरेपछि अब ख श्रेणीका एम्बुलेन्स दुईवटा भएको हो ।

यसअघि चालु आर्थिकबर्षदेखि पालुङ्टार ६ गाईखुर स्वास्थ्यचौकीमा एक ख श्रेणीकै एम्बुलेन्स सञ्चालनमा छ ।
मंगलबार काठमाण्डौमा एक समारोहका बीच रेडक्रस सोसाइटीको अन्तर्राष्ट्रिय संस्था आइएफआरसीले गोरखा सहित ३० जिल्लालाई ख श्रेणीको एम्बुलेन्स हस्तान्तरण गरेको हो ।

सोही क्रममा गोरखाले पनि ख बर्गको एम्बुलेन्स प्राप्त भएको नेपाल रेडक्रस सोसाइटी गोरखाका कार्यालय प्रमुख सुवास घिमिरेले बताए । रेडक्रस सोसाइटी अन्तर्राष्ट्रिय समिति(आईएफआरसि) का महासचिव जगन चापागाइले नेपाल रेडक्रस सोसाइटी गोरखाको मनकामना उपशाखालाई एम्बुलेन्स हस्तान्तरण गरेको उनले बताए ।

सुविधा सम्पन्न एम्बुलेन्स निशुल्क प्राप्त भएको बताउदै अब जिल्लामा बिरामी बोक्न धेरै सहज हुने उनले बताए । शहिदलखन गाउँपालिका वडा नं २ र ३ मा रहेको रेडक्रसको मनकामना उपशाखाले सो एम्बुलेन्स संचालन गर्ने उनले बताए । तर एम्बुलेन्स भने जिल्लामा जुनसुकै स्थानमा पनि माग गरे अनुसार संचालन गर्न सकिने उनले बताए ।

यसमा स्वास्थ्यकर्मी, भेन्टिलेटर, ग्याँस सिलिण्डर, जिपिए सिस्टम, ओकेटोके भएको र हातधुने पानी सहितको व्यवस्था हुने उनले बताए । यसमा विरामी स्वास्थ्यकर्मीको प्रत्यक्ष हेरचाह हुनेछ । धेरै सुविधा भएसँगै भाडा दर पनि अन्यमा भन्दा महङ्गो हुने भएकाले विरामीको माग अनुसार संचालन गरिने उनको भनाइ छ ।

एम्बुलेन्स संचालनका लागि कागजातको सबै प्रक्रिया पूरा गरेर फागुन महिनाबाट संचालन गर्ने तयारीमा रहेको घिमिरेले बताए । एम्बुलेन्स सञ्चालनको अनुमति प्रमुख जिल्ला अधिकारी संयोजक प्रमुख जिल्ला अधिकारी, स्वास्थ्य कार्यालय गोरखाका प्रमुख लगायतका व्यक्तिहरुसँगको छलफलपछि एम्बुलेन्स संचालन गरिने जनाएको छ ।

गोरखामा यसअघि पालुङ्टार नगरपालिका वडा नं ६ को गाईखुर स्वास्थ्य चौकीले मात्र ख बर्गको एम्बुलेन्स संचालन गर्दै आएको छ । जर्मन राजदुतावासबाट प्राप्त गरेको सो ख बर्गको एम्बुलेन्स यो वर्षबाट संचालन गर्ने अनुमति प्राप्त गरी सेवा सुरु गरेको स्वास्थ्य कार्यालय गोरखा सूचना अधिकारी नवराज खड्काले जानकारी दिए ।

मंगलबार मनकामना उपशाखाले ख बर्गको एम्बुलेन्स प्राप्त गरेता पनि संचालन अनुमति लिन भने बाँकी छ । दुवै संचालनमा भएमा जिल्लामा ख बर्गको एम्बुलेन्सको संख्या दुई वटा हुनेछ । सदरमुकाममा भने सबै ‘ग श्रेणी’का एम्बुलेन्स मात्र सञ्चालनमा छन् । कानूनी भाषामा ‘ग श्रेणी’को एम्बुलेन्सलाई एम्बुलेन्स नभनी बिरामी बोक्ने सवारी साधन मात्र भन्न पाइने व्यवस्था छ ।

आरुघाट गाउँपालिका ४ आरुआर्बाङबाट पनि ‘ख’ वर्गको एम्बुलेन्सका सञ्चालनका लागि गोरखाबाट सिफारिस भएको तर अहिलेसम्म संचालनमा नरहेको उनले बताए । जिल्ला स्तरीय एम्बुलेन्स समितिका संयोजक प्रजिअले एम्बुलेन्स संचालनका लागि प्रादेशिक एम्बुलेन्स व्यवस्थापन समितिलाई सिफारिस गर्ने व्यवस्था रहेको छ ।

अहिले गोरखामा ग बर्गका ५९ वटा विरामी ओसार्ने सवारी साधन दर्ता स्वास्थ्य कार्यालय गोरखाले जनाएको छ ।