२२ पौष ,काठमाडौं । इंग्लिस प्रिमियर लिग फुटबलमा शीर्ष स्थानको लिभरपुलले अंक बाँडेको छ । आइतबार राति भएको खेलमा लिभरपुलले यस सिजन खराब अवस्थामा रहेको म्यानचेस्टर युनाइटेडसँग २–२ गोलेको बराबरी खेलको हो । पहिलो हाफ गोलरहित बराबरी भएको खेलमा सबै ४ गोल दोस्रो हाफमा निस्किएका हुन् । 

दोस्रो हाफको सुरुआतमा म्यानचेस्टर युनाइटेडका लिसान्ड्रो मार्टिनेजले ५२औं मिनेटमा उत्कृष्ट गोल गर्दै युनाइटेडलाई अग्रता दिलाए । तर, लिभरपुलले सात मिनेटमै बराबरी गोल फर्कायो ।  लिभरपुलका कोडी गाक्पोले गोल गर्दै खेल बराबरीमा ल्याएका थिए ।

७० औं मिनेटमा म्याथियस डे लिग्टको ह्यान्ड भएपछि लिभरपुलले पेनाल्टी पायो । उक्त पेनाल्टीलाई मोहम्मद सालाहले गोलमा परिणत गर्दै लिभरपुललाई २–१ को अग्रता दिलाए । तर, म्यानचेस्टर युनाइटेडका लागि ८५औं मिनेटमा अमद डायलोले एलेहाण्ड्रो गार्नाचोको पासलाई गोलमा परिणत गर्दै खेललाई २–२ को बराबरीमा ल्याए ।  

इन्जुरी समयमा म्यानचेस्टर युनाइटेडका ह्यारी म्याग्वायरले मौका गुमाउँदा जीत दर्ता गर्ने अवसर पनि खेर गएको थियो । यदि त्यो गोल भएको भए, युनाइटेडले २०१६ पछि पहिलोपटक एनफिल्डमा जित दर्ता गर्ने थियो ।

बराबरीपछि लिभरपुलले दोस्रो स्थानमा रहेको आर्सनलसँगको अग्रता आठ अंक पु¥याउने मौका गुमाएको छ । तर, लिभरपुलको एक खेल बाँकी रहेको छ । युनाइटेड भने तालिकाको १३औं स्थानमा उक्लिएको छ ।  

अब, म्यानचेस्टर युनाइटेडले आइतबार एफए कपको तेस्रो राउन्डमा आर्सनलसँग प्रतिस्पर्धा गर्नेछ । लिभरपुल भने बुधबार इएफएल कपको सेमिफाइनलको पहिलो लेगमा टोटनहममसँग खेल्ने छ ।