कुरिनटार । नेकपा एमाले इच्छाकामना गाउँ कमिटिको शपथ ग्रहण तथा पहिलो बैठक सम्पन्न भएको छ । आईतबार कुरिनटार स्थित पार्टी कार्यालयमा एक कार्यक्रमको आयोजना गरि नेकपा एमालेका पोलिटव्यूरो सदस्य तथा जिल्ला इन्चार्ज देवीप्रसाद ज्ञवालीको प्रमुख आतिथ्यतामा नवनिर्वाचित गाउँकमिटिको शपथग्रहण तथा पहिलो बैठक सम्पन्न भएको हो ।

शपथ ग्रहण कार्यक्रममा एमाले केन्द्रिय सदस्य तथा चितवन क्षेत्र नं. २ इन्चार्ज कृष्णभक्त पोखरेल, बागमतीका वनमन्त्री एवं एमाले बागमती प्रदेश कमिटि सदस्य कृष्ण सिलवाल, प्रदेश कमिटि सदस्य दिवस पाण्डे, जिल्ला अध्यक्ष कमल पाठक, जिल्ला समन्वय समिति चितवनका प्रमुख नारायणप्रसाद अधिकारी, गाउँपालिका अध्यक्ष दान बहादुर गुरुङ, लगायतको आतिथ्यता रहेको थियो ।

गत पौष १२ गते सम्पन्न दोश्रो अधिवेशनले प्रकाश अधिकारीको नेतृत्वमा ७५ सदस्यीय गाउँ कमिटी  सर्वसम्मत निर्वाचित भएको थियो । अधिवेशनले उपाध्यक्षमा लक्ष्मण चेपाङ, सचिवमा बोध बहादुर गोले, उपसचिवमा शान्ता पाण्डे त्रिपाठी र कृष्ण गुरुङलाई चयन गरेका थिए । 

पदभारग्रहण गर्दै गाउँ कमिटी अध्यक्ष  प्रकाश अधिकारीले  पार्टीलाई जनतासँग जोड्न र पार्टी संगठनलाई थप सुदृढ तथा सशक्त बनाउने प्रतिवद्धता व्यक्त गरेका थिए । 

यस्तै कार्यक्रमलाई प्रमुख अतिथिको रुपमा सम्बोन्धन गर्दै नेकपा एमाले पोलिटव्युरो सदस्य एवं चितवन जिल्ला इन्चार्ज देवी ज्ञवालीले एमाले जनताको पार्टी हो भन्ने जनताको मन मनमा पर्ने गरी काम गर्न नवनिर्वाचित गाउँकमिटिलाई निर्देशन दिएका थिए भने केन्द्रीय सदस्य कृष्णभक्त पोखरेलले एमालेलाई चौतर्फि घेराबन्दी गर्ने प्रयास भएपनि यो देश परिवर्तनका लागि एमाले निर्विकल्प रहेको बताए ।

साथै पछिल्लो समय केही व्यक्तिहरुले पार्टीमै बसेर पार्टी विरुद्ध नै गालीगलौज गर्दै सामाजिक सञ्जालमा लेख्ने प्रवृत्ति बढेको भन्दै एउटा सच्चा कार्यकर्ताले त्यस्तो कार्य गर्न नहुने एमाले बागमति प्रदेश कमिटि सदस्य एवं बागमतीका वनमन्त्री कृष्ण सिलवालले बताए ।