काठमाण्डौ । बागमती प्रदेशका वन तथा वातावरण मन्त्री कृष्ण सिलवाले सामुदायिक वन समुदायकै सम्पत्ति भएकाले त्यसको संरक्षण, व्यवस्थापन र दिगो उपयोगमा सबैको साझा जिम्मेवारी रहेको बताउनुभयो। शुक्रबार सम्पन्न सामुदायिक वन उपभोक्ता महासंघ नेपाल, बागमती प्रदेशको दोस्रो प्रदेश परिषद् कार्यक्रमलाई सम्बोधन गर्दै प्रमुख अतिथि वनमन्त्री सिलवालले यस्तो बताउनुभएको हो ।

उहाँले समुदायमा आधारित वन व्यवस्थापनलाई थप व्यवस्थित गर्दै नागरिकको जीवनस्तर उकास्ने गरी आयआर्जनका कार्यक्रम सञ्चालन गर्नुपर्नेमा जोड दिनुभयो। साथै, वन नीति निर्माणको प्रक्रियामा महासंघसँग समन्वय गरी अघि बढ्न सरकार प्रतिबद्ध रहेको बताउँदै उहाँले अराजकता, अव्यवस्था र अनियमितता अन्त्य गर्न संवाद र सहकार्यमार्फत समाधान खोजिनुपर्ने धारणा राख्नुभयो।

महासंघका अध्यक्ष विनोद सापकोटाले सामुदायिक वन जनताले हुर्काएको सम्पत्ति भएको हुँदा यसमा अरू कसैको अनावश्यक हस्तक्षेप हुन नहुने स्पष्ट पार्नुभयो। उहाँले वनको संरक्षण, विकास र न्यायोचित उपयोग सन्दर्भमा सरकारको ध्यान दिनुपर्नेमा जोड दिँदै वनको दिगो विकासका लागि सरकार र महासंघबीच सहकार्य आवश्यक रहेको बताए।

कार्यक्रमको अवसरमा सामुदायिक वन उपभोक्ता महासंघ, बागमती प्रदेशले सामुदायिक वनसम्बन्धी समस्या, सुधारका आवश्यकताका लागि नीति तथा कार्यक्रमका लागि सुझावहरू समेटिएको ज्ञापनपत्र प्रदेश सरकारका वन तथा वातावरण मन्त्री कृष्ण सिलवाललाई बुझाएको छ।

कार्यक्रममा सामुदायिक वन उपभोक्ता महासंघ नेपालका वरिष्ठ उपाध्यक्ष वृख्र बहादुर शाही, महासचिव पार्वता गौतम, सचिवालय सदस्य नारायण नेपाल, फरेस्ट एक्सन नेपाल, रिकफ्ट नेपाल, वन पैदावार उद्योग व्यवसायी संघ लगायतका प्रतिनिधि तथा १३ वटै जिल्लाबाट आएका जिल्ला अध्यक्षहरू, स्थानीय महासंघका अध्यक्ष तथा प्रतिनिधिहरूको उपस्थिति रहेको थियो।