ऐना पहरा क्षेत्रमा Skywalk निर्माणको प्रक्रिया सुरु

इच्छाकामना न्युज

१४, जेठ २०८२

ऐना पहरा क्षेत्रमा Skywalk निर्माणको प्रक्रिया सुरु

आँबुखैरेनी, १४ जेष्ठ । तनहुँको आँबुखैरेनी गाउँपालिकाले ऐना पहरा क्षेत्रको पर्यटन प्रवर्द्धन लागि Skywalk निर्माणको प्रक्रिया सुरु गरेको छ। यो परियोजना पर्यटनको विकास र साहसिक गतिविधिहरूको लागि महत्वपूर्ण कदम मानिएको छ।

गाउँपालिकाले ऐना पहरा क्षेत्रलाई साहसिक क्रियाकलापका लागि उपयुक्त स्थलका रूपमा विकसित गर्ने योजना बनाएको हो। हाल सर्भे कार्य भइरहेको र Skywalk निर्माणको तयारीले तीव्रता लिएको गाउँपालिकाले जनाएको छ । यो परियोजनाबाट स्थानीय पर्यटनको विस्तार र आर्थिक विकासको नयाँ अवसर सिर्जना हुने आशा गरिएको छ।

गाउँपालिकाका अध्यक्ष शुक्र चुमानले ऐनापहरा क्षेत्रको पर्यटनमा नयाँ युगको शुरुवात हुने विश्वास व्यक्त गर्दै भने, "Skywalk निर्माणले यहाँको पर्यटनलाई नयाँ उचाइमा पुर्याउनेछ र यसले स्थानीय समुदायको जीवनस्तरमा सुधार ल्याउनेछ।" अध्यक्ष चुमानका अनुसार, यो परियोजना स्थानीय रोजगारीको सृजनासहित क्षेत्रको समग्र विकासमा ठूलो योगदान पुर्याउने छ।

यसका साथै, ऐनापहरा क्षेत्रको प्राकृतिक सौन्दर्य र साहसिक गतिविधिहरूको संयोजनले यो स्थानलाई पर्यटनको प्रमुख गन्तव्य बनाउने छ। गाउँपालिकाले ऐनापहरा क्षेत्रमा विभिन्न पूर्वाधारका कामहरू अघि बढाइरहेको छ, जसले गर्दा यहाँको पर्यटन क्षेत्रलाई थप सशक्त बनाउन मद्दत पुर्याउने छ ।