चितवन, साउन १६ । साउन महिनाको सुरुवातसँगै चितवनमा डेङ्गु सङ्क्रमण फैलिन थालेको छ। यहाँका विभिन्न अस्पतालमा उपचारका लागि आएका बिरामीमध्ये हालसम्म २० जनामा डेङ्गु पुष्टि भएको जनस्वास्थ्य कार्यालय चितवनले जनाएको छ।

चालु आर्थिक वर्षको पहिलो १५ दिनमा गरिएको ७९८ जनाको परीक्षणमा २० जनामा सङ्क्रमण देखिएको हो। कार्यालयकी जनस्वास्थ्य अधिकृत अंशु पोखरेलका अनुसार संक्रमितमध्ये १४ जना चितवन जिल्लाका हुन् भने ६ जना अन्य जिल्लाबाट आएका छन्।

चितवनका संक्रमितमध्ये भरतपुर महानगरपालिकाका ७ जना, खैरहनी नगरपालिकाका ३ जना, रत्ननगर नगरपालिकाका २ जना र कालिका नगरपालिकाका २ जना रहेका छन्। संक्रमितमध्ये ५ जना पुरुष र ९ जना महिला रहेको बताइएको छ।

जनस्वास्थ्य कार्यालय चितवनका प्रमुख डा. दिनेश रुपाखेतीका अनुसार हालको मौसम – वर्षा र घामको पालो – लामखुट्टेका लागि अनुकूल हुने भएकाले साउन, भदौ र असोज महिनामा डेङ्गुको जोखिम उच्च हुने गर्दछ।

एडिस जातको पोथी लामखुट्टेको टोकाइबाट सर्ने डेङ्गु प्रायः बिहान र साँझको समयमा टोक्ने गर्दछ। यसले प्रायः सफा पानी जम्मा हुने ठाउँ – जस्तै प्लास्टिकका डब्बा, टिन, थोत्रा टायर, गमला, खुल्ला पानी ट्याङ्की, कुलर आदि – मा अण्डा पार्ने गर्दछ।

डा. रुपाखेतीका अनुसार डेङ्गु लागेपछि बिरामीलाई आँखाको गेडी र टाउको दुख्ने, शरीर कट्कटी दुख्ने, जोर्नी, हड्डी तथा मांशपेशी दुख्ने, ज्वरो आउने, शरीरमा विविरा आउने तथा कतिपय अवस्थामा रक्तस्रावसमेत हुने जस्ता लक्षण देखिन्छन्।

डेङ्गुबाट बच्नको उपाय भनेको लामखुट्टेको टोकाइबाट जोगिनु नै हो। त्यसका लागि घर वरिपरिको सरसफाइ गर्न, पानी जम्न नदिनु, मच्छरदानी वा लामखुट्टे भगाउने साधनको प्रयोग गर्नु मुख्य उपाय हुन्।