कुरिनटार ।  चितवनको इच्छाकमना ४ कुरिनटारमा रहेको इच्छाकामना आधारभूत अस्पताललाई थाइराइड, भिटामिन बी र डी  परिक्षण गर्ने इम्युनोएस्से अनालाइजर मेसिन हस्तान्तरण गरिएको छ । लायन्स क्लब अफ चितवन चौतारीले  आइतबार एक कार्यक्रमकाबिच अस्पताललाई रु १७ लाख मुल्य बराबरको उक्त मेसिन हस्तान्तरण गरिएको हो । 

हस्तान्तरण कार्यक्रममा लायन्स  डिस्ट्रिक गभर्नर नवराज सापकोटाले  इच्छाकामना पहाडी दुर्गम भूगोल रहेका कारण यहाँका जनताहरुको  शिक्षा स्वास्थ्य लगायतमा पहुँच कम  भएकोले लायन्सले  सहयोग गरेको बताउनुभयो । लायन्सले  सर्वशान्ति माध्यमिक विद्यालय कुरिनटारमा पनि डेढ करोडको परियोजना सञ्चालनको तयारी गरिरहेको बताउनुभयो ।आगामी दिनमा इच्छाकामनामा आवश्यक थप सहयोगका कार्यक्रमहरु ल्याउने प्रतिवद्धता जनाउनुभयो । पछि परेको भूगोल र समुदायका लागि लायन्सले  सहयोग गरिरहेको बताउनुभयो । 

गाउँपालिका अध्यक्ष दान बहादुर गुरुङले  लायन्स क्लब चितवन चौतारीको सहयोगले  यहाँको जनताले थप सेवा पाउने अवसर प्रदान भएकोमा धन्यवाद दिनुभयो ।  गाउँपालिकाले इच्छाकामनाको नागरिकको  स्वास्थ्य सेवाका लागि सबैसँग सहकार्य गरिरहेको बताउनुभयो । गाउँपालिकाले १५ शैयाको अस्पताल भवन निर्माण कार्य गरिरहेको बताउनुभयो । भवन निर्माण सम्पन्न भएपछि यहाँका नागरिकको स्वास्थ्य सेवाका लागि थप सहज हुने  बताउनुभयो ।  इच्छाकामना आधारभूत अस्पतालका प्रमुख डा.अभिषेक लिम्बुले  यस अस्पतालले धादिङ र गोरखाका नागरिकले समेत सेवा  प्रदान गर्दै आइरहेको बताउनुभयो । यस थाइराइड परिक्षण मेसिन उपलब्ध भएसगैँ इच्छाकामना र आसपासका गाउँपालिका नागरिकहरुको उपचारमा थप सहयोग मिलेको बताउनुभयो । 

लायन्स क्लब अफ चितवन चौतारीका अध्यक्ष  दीपक बस्नेतको पहलमा लायन्सले उक्त मेसिन सहयोग उलब्ध गराएको हो ।  उहाँले पछिल्लो समय थाइराइडका बिरामीहरुले बढ्दै गएकाले इच्छाकामनाका नागरिकलाई पालिकामै सेवा  उपलब्ध गराउने उदेश्यले आफुले सहयोग लागि पहल गरेको र सबैको सहयोगले सफल भएको बताउनुभयो ।  

यस मेसिन हस्तान्तरणसगैँ गाउँपालिकामा पहिलो पटक थाइराइड सेवा सञ्चालनमा आएको छ ।  थाइराइड परिक्षणका लागि  भरतपुर काठमाडौँ जानु पर्ने झन्झटको अन्त्य भएको छ । 

हस्तानन्तरण कार्यक्रममा गाउँपालिका उपाध्यक्ष माया सिलवाल, प्रमुख प्रशासकिय अधिकृत चन्द्रकान्त बस्नेत, वडा नम्बर ४ का वडाध्यक्ष रुद्रप्रसाद उप्रेती, स्वास्थ्यकर्मी ,विभिन्न संघसस्थका प्रतिनिधिहरुको उपस्थितिरहेको थियो ।