एपिस्टन कान्डमा नाम आएपछि गोल्डम्यान श्याख्सकी शीर्ष वकिलले दिइन् राजीनामा

एजेन्सी

२, फाल्गुण २०८२

एपिस्टन कान्डमा नाम आएपछि गोल्डम्यान श्याख्सकी शीर्ष वकिलले दिइन् राजीनामा

वासिङटन डीसी । अमेरिकी बहुराष्ट्रिय वित्तीय सेवा प्रदायक कम्पनी गोल्डम्यान स्याक्सकी प्रमुख कानुन अधिकारी क्याथी रुम्लरले पदबाट राजीनामा दिएकी छिन् । यौन दूराचारी जेफ्री एपस्टिनसँग सम्बन्धित कागजात सार्वजनिक भएपछि उत्पन्न विवादका बिच उनले राजीनामा दिने घोषणा गरेकी हुन् । उनको राजीनामा आगामी जुन ३० देखि लागू हुने बताइएको छ ।

पछिल्ला केही हप्तादेखि एपस्टिनसँगको सम्बन्धबारे विभिन्न समाचार आएपछि उनले आलोचना खेपिरहेकी थिइन् । उनी र उनका निकट स्रोतहरूले भने एपस्टिनसँगको सम्बन्ध केवल व्यावसायिक स्तरको रहेको दाबी गर्दै आएका छन् । सीएनएनलाई दिएको वक्तव्यमा रुम्लरले गोल्डम्यान स्याक्समा विगत छ वर्षदेखि काम गर्नु आफ्नो लागि गौरवको विषय रहेको बताइन् । आफ्नो मेरो जिम्मेवारी कम्पनीको हितलाई पहिलो प्राथमिकतामा राख्नु भन्दै उनले पद त्याग गर्ने निर्णय सुनाएको बताएकी हुन् ।

कम्पनीका सीईओ डेभिड सोलोमनले पनि रुम्लरको योगदानको प्रशंसा गरेका छन् । रुम्लरलाई उत्कृष्ट कानुनी सल्लाहकार, कुशल पेशेवर तथा धेरै कर्मचारीका लागि मार्गदर्शक भन्दै उनको निर्णयको सम्मान गर्ने सोलोमनले बताए । अमेरिकाको न्याय मन्त्रालयले हालै जेफ्री एपस्टिनसँग सम्बन्धित लाखौँ पृष्ठका कागजात सार्वजनिक गरेपछि विभिन्न राजनीतिक, व्यावसायिक तथा सामाजिक व्यक्तित्वहरू पुनः चर्चामा आएका छन् । यही सन्दर्भमा रुम्लरको नाम पनि जोडिएको हो ।